Kryeministri Edi Rama merr pjesë sot në Konferencën e 10-të Ndërqeveritare Shqipëri–BE që po mbahet në Luksemburg. Vendi ynë shënoi një zhvillim të rëndësishëm në rrugën drejt integrimit europian, teksa pritet të formalizohet mbyllja e negociatave për Kapitullin 20 që flet për ndërmarrjet dhe politikat industriale.
Ky zhvillim e çon në katër numrin e kapitujve të mbyllur përkohësisht nga ana e Shqipërisë, ndërkohë që vijon puna për të përmbushur synimin e madh të mbylljes së të gjitha negociatave brenda vitit 2027. Konkretisht, Kapitulli 20 ka të bëjë drejtpërdrejt me zhvillimin e sipërmarrjeve, orientimin e politikave industriale, mbështetjen për bizneset, nxitjen e inovacionit dhe forcimin e konkurrueshmërisë në ekonominë shqiptare.
Sipas agjendës zyrtare, ngjarja nisi në orën 16:40 me nisjen drejt Qendrës Europiane të Konventave, pasuar nga fotografia e përbashkët e Kryeministrit Edi Rama me Komisioneren Marta Kos dhe ministrin Thomas Byrne. Konferenca u hap në orën 17:00, ndërsa në orën 17:45 është parashikuar konferenca e përbashkët për shtyp e tyre.
