Pas disa vitesh stanjacioni ose rënieje, biznesi privat i shëndetit në Shqipëri i është rikthyer rritjes gjatë vitit 2025. Ky zhvillim është ndikuar nga ofertat më agresive të spitaleve, përkeqësimi i shërbimeve në sektorin shtetëror dhe orientimi i pacientëve drejt kujdesit privat, shpesh i mbështetur nga shoqëritë e sigurimit.
Të dhënat nga bilancet e katër spitaleve të mëdha private, “American Hospital” (përfshirë “International Hospital”), “Salus”, “German Hospital International” dhe “Spitali Europian”, tregojnë se të ardhurat e tyre të kombinuara arritën në rreth 10.5 miliardë lekë, duke shënuar një rritje prej 11.3% krahasuar me vitin e mëparshëm. Peshën kryesore në këtë treg e mban “American Hospital”, i cili gjatë vitit 2025 raportoi 8.5 miliardë lekë të ardhura, me një rritje prej 52.5% në raport me vitin e mëparshëm, duke reflektuar edhe vitin e parë të plotë pas bashkimit me “International Hospital”.
Operatorët e tregut theksojnë se zhvendosja e pacientëve nga sistemi publik drejt atij privat lidhet me kohën e gjatë të pritjes, vështirësitë në aksesin e ekzaminimeve të specializuara dhe mungesën e disa shërbimeve në shtet, siç është kontrolli me Pet Scanner. Për më tepër, spitalet private synojnë zgjerimin e aktivitetit drejt turizmit mjekësor, duke shfrytëzuar diferencën e kostove me vendet e Bashkimit Europian.
Në krahun tjetër, tregu i medikamenteve ka vijuar të shënojë ecuri pozitive. Importet e produkteve farmaceutike u rritën me 4.9% në vitin 2025, duke arritur në 29.5 miliardë lekë, të ndikuara nga plakja graduale e popullsisë dhe pasojat afatgjata të pandemisë. Kompanitë e shpërndarjes farmaceutike, si “Rejsi Farma”, “Trimed”, “Ilma” dhe të tjerë, kanë raportuar rritje të ndjeshme të xhiros dhe konsolidim të pozitave të tyre financiare gjatë kësaj periudhe.
