Shtrenjtimi i ushqimeve vijon të ushtrojë trysni mbi buxhetet e familjeve shqiptare, të detyruara të kufizojnë shpenzimet e tyre. Sipas të dhënat zyrtare të publikuara nga Instituti i Statistikave, inflacioni u rrit në 2.8 për qind gjatë muajit shtator, nga 2.4 për qind që ishte në të njëjtën periudhë të një viti më parë, megjithëse krahasuar me muajin gusht ritmi i shtrenjtimit ka shënuar një farë ngadalësimi.
Qytetarët shprehen se kostot e larta të jetesës i detyrojnë të shtrëngojnë më tej shpenzimet e përditshme. Përkundër pranisë së prodhimeve vendase në treg, inflacioni në grupin e ushqimeve dhe pijeve arriti në 2.8 për qind në shtator, duke u rritur ndjeshëm nga 1.8 për qind sa ishte një vit më parë, ndërsa mbeti i pandryshuar në raport me muajin gusht.
Eksperti i sektorit bujqësor, Ilir Pilku, vlerëson se zhvillimi i turizmit kërkon një vëmendje më të madhe ndaj bujqësisë për të mbështetur ekonominë dhe fermerët.
Duke parë edhe pjesën e turizmit që po na rritet goxha, do të ishte një gjë e mirë për ne sikur të ktheheshin pak sytë te bujqësia. Do ndihmonte ekonominë, fermerët, pra të gjithë ne. Do plotësonte nevojat edhe për turizmin, por edhe për konsum të brendshëm
Pilku shton se braktisja e tokave dhe lënia e tyre djerrë e kanë bërë vendin të varet pothuajse plotësisht nga produktet e importit.
Së pari prodhimi ynë bujqësor duhet të strukturohet më mirë dhe t’i përshtatet ndryshimeve klimatike. E para duhet të dalim me prodhim shumë më herët dhe e dyta në kulmin e sezonit turistik veror që është në muajt korrik e gusht ne duhet të kemi sa më shumë prodhim vendas
Ndërkohë, sipas të dhënave të INSTAT, rritje vjetore ka pësuar edhe treguesi i lëndëve djegëse, i cili nga 1.8 për qind në shtator të vitit të kaluar, u rrit në 2.7 për qind gjatë muajit të shkuar.
