Ecuria pozitive e ekonomisë shqiptare nuk po arrin të shndërrohet në një përmirësim të prekshëm të standardit të jetesës për qytetarët. Teksa Prodhimi i Brendshëm Bruto (PBB) shënoi një rritje prej më shumë se 3.5 për qind, shpenzimet mujore të konsumit familjar u zgjeruan me vetëm 2.3 për qind.
Përqendrimi i të ardhurave dhe barra e inflacionit
Diferenca mes ritmit të rritjes ekonomike dhe konsumit të përditshëm shpjegohet me shpërndarjen e pabarabartë të të ardhurave. Eksperti për ekonominë, Eugen Musta, vuri në dukje se rritja nuk prek njësoj të gjitha shtresat.
Duhet parë dhe analizuar se nga vjen kjo rritje. Pasi ka sektorë që kur ndodh rritja tek ata, kapitali përqendrohet vetëm te një pjesë e shoqërisë dhe pjesa tjetër mbetet në vendnumëro
Ky hendek thellohet më tej kur merret në konsideratë inflacioni mesatar prej 2.2 për qind gjatë vitit të shkuar, i cili zbehu efektin e të ardhurave nominale.
Pra familjet nuk është se patën më tepër para në xhepa, por thjesht shpenzimet u rritën nga inflacioni. Pra shqiptarët duket se kanë jetuar gjatë vitit 2025 më keq se sa gjatë 2024-s. Me pak fjalë, ndërsa çmimet janë rritur, shqiptarët kanë blerë më pak mallra e shërbime se sa gjatë vitit 2024
Shpenzimet për ushqim dhe rekomandimet e BERZH
Struktura e shpenzimeve mbetet gjithashtu një tregues i qartë i vështirësive ekonomike. Pothuajse 40 për qind e buxhetit të një familjeje shqiptare shkoi për blerjen e ushqimeve. Ky nivel është dukshëm më i lartë krahasuar me vendet e rajonit, ku shpenzimet për ushqim nuk i kalojnë 27 për qind, si dhe me mesataren e Bashkimit Europian prej vetëm 15 për qind.
Fakti që pesha e shpenzimeve për ushqim në raport me totalin në vend është në nivele kaq të larta nuk do të thotë se shqiptarët ushqehen më mirë se qytetarët e tjerë të Europës apo Rajonit.
Për të zbutur këtë diferencë me vendet europiane dhe për të rritur mirëqenien qytetare, Banka Europiane për Rindërtim dhe Zhvillim (BERZH) thekson nevojën e zbatimit të reformave strukturore, orientimit drejt zhvillimit të gjelbër, stimulimit të investimeve si dhe ndaljes së ritmeve të emigracionit.
