Këshilli Mbikëqyrës i Bankës së Shqipërisë vendosi të mbajë të pandryshuar normën bazë të interesit në nivelin 2.5%. Guvernatori Gent Sejko deklaroi se inflacioni ka gjasa të rritet më tej gjatë dy tremujorëve në vijim, por shtoi se kjo rritje pritet të jetë e moderuar dhe e përkohshme, duke u kthyer gradualisht drejt objektivit nga mesi i vitit të ardhshëm.
Sipas Sejkos, rritja e inflacionit gjatë muajve korrik dhe gusht u ndikua kryesisht nga çmimet e karburanteve dhe ushqimeve të papërpunuara, ndërsa inflacioni i shërbimeve dhe i qirave shënoi rënie. Ai theksoi se ecuria e inflacionit pasqyroi rritjen e presioneve të huaja, ku çmimet e produkteve bazë dhe inflacioni te partnerët tregtarë nuk u kompensuan plotësisht nga forcimi i kursit të këmbimit. Nga ana tjetër, presionet e brendshme vazhdojnë të ndikohen nga mungesat në tregun e punës dhe rritja e shpejtë e pagave.
Rritja e inflacionit në muajt korrik – gusht ishte disi më e shpejtë se pritjet tona. Nga këndvështrimi i strukturës së shportës, rritja e inflacionit u ndikua nga rritja e çmimeve të karburantit dhe të ushqimeve të papërpunuara, u shpreh Guvernatori i Bankës së Shqipërisë, Gent Sejko.
Banka e Shqipërisë vlerëson se qëndrimi aktual i politikës monetare mbetet i përshtatshëm për të garantuar kthimin e inflacionit në objektiv dhe për të adresuar pasiguritë ekonomike. Megjithatë, Këshilli Mbikëqyrës paralajmëroi se tensionet gjeopolitike në Lindjen e Mesme dhe zhvillimet në tregun e punës përbëjnë rreziqe që mund të çojnë në një reagim shtrëngues të politikës monetare në të ardhmen.
Sa i takon ekonomisë kombëtare, ritmi i rritjes pritet të jetë pak më i lartë se parashikimet e mëparshme. Ky zgjerim ekonomik do të mbështetet nga bilancet likuide të sektorit privat, ambienti i favorshëm financiar dhe rritja e vazhdueshme e punësimit e e pagave në vend.
