Bordi i Transparencës dhe Kufizimit të Përkohshëm të çmimeve të tregtimit me shumicë dhe pakicë të nënprodukteve të naftës e të gazit ka ndryshuar zyrtarisht tarifat e karburanteve në tregun vendas.
Sipas vendimit të marrë gjatë mbledhjes së kësaj të mërkure, çmimi maksimal i shitjes me pakicë për naftën do të jetë 210 lekë për litër, ndërsa shitja me shumicë u caktua jo më shumë se 198 lekë për litër.
Sa i përket benzinës, vlera e përcaktuar për tregtimin me pakicë është vendosur në jo më shumë se 190 lekë për litër, kurse çmimi i shitjes me shumicë nuk do të kalojë 178 lekë për litër.
Ndryshimet e miratuara nga Bordi kanë hyrë në fuqi ditën e mërkurë në orën 11:30. Këto tarifa do të mbeten në fuqi deri në mbledhjen e radhës së institucionit, ku do të rivlerësohen lëvizjet e çmimeve në tregje.
