Bordi i Transparencës ka përcaktuar tabelën e re të çmimeve për tregtimin e hidrokarbureve në vend, e cila ka hyrë në fuqi që prej orës 13:00 të ditës së sotme.
Sipas vendimit të ri, çmimi i shitjes me pakicë për nënproduktin gazoil të standardit SSH EN 590 është caktuar në jo më shumë se 213 lekë për litër, kurse shitja me shumicë do të jetë jo më shumë se 201 lekë për litër. Ky ndryshim shënon një ulje nga çmimi i mëparshëm prej 217 lekësh për litër me pakicë.
Nga ana tjetër, nënproduktit i benzinës së standardit SSH EN i është vendosur një çmim shitjeje me pakicë prej jo më shumë se 194 lekësh për litër, ndërsa ai me shumicë nuk do të kalojë 182 lekë për litër. Më parë, benzina tregtohej në tregun vendas me 193 lekë për litër.
Autoritetet kanë përcjellë një paralajmërim të qartë për të gjithë operatorët ekonomikë që ushtrojnë aktivitetin në tregtimin me shumicë dhe pakicë, duke u kërkuar zbaktimin e detyrueshëm të këtyre tavaneve të çmimeve. Në rast konstatimi të shkeljeve, ndaj subjekteve përgjegjëse do të merret masa e pezullimit të aktivitetit.
Ky vendim është marrë në kuadër të situatës së veçantë të shpallur për tregun e hidrokarbureve, me qëllim parësor mbrojtjen e konsumatorëve dhe garantimin e konkurrencës së ndershme në treg.
