Autoriteti Rrugor Shqiptar ka nisur procedurat për studimin dhe projektimin e hyrjes së re veriore të kryeqytetit, e cila synon të integrojë autostradat e veriut me Unazën e Madhe, duke shmangur lëvizjen përmes qendrës së Kamzës. Për këtë procedurë është caktuar një fond limit prej 138.6 milionë lekësh pa TVSH, ndërsa afati i fundit për dorëzimin e ofertave nga operatorët e interesuar është përcaktuar data 11 nëntor.
Sipas dokumentit të termave të referencës, ky aks i ri parashikohet të shtrihet në një gjatësi prej rreth 17 kilometrash. Pika e nisjes do të jetë në zonën jugore të nyjes së Rinasit, duke u lidhur me autostradën Thumanë–Kashar, ndërsa pika e fundit do të jetë në Unazën e Madhe të Tiranës, në zonën e Paskuqanit. Gjurma e studimit kalon nëpër territoret e Valiasit dhe Zallherrit, si dhe ndërpret aksin rrugor Kamëz – Fushë-Krujë.
Ky investim ka për qëllim kryesor lehtësimin e fluksit të mjeteve që vijnë nga rajoni verior drejt Tiranës, duke krijuar gjithashtu mundësinë e vazhdimit të lëvizjes drejt autostradës Tiranë – Elbasan dhe Korridorit VIII. Segmenti do të projektohet në cilësinë e një rruge ndërurbane kryesore.
Kompania që do të shpallet fituese e konsulencës do të duhet të analizojë të paktën dy variante të ndryshme, ku njëri prej tyre duhet të përdorë rrugë ekzistuese, duke përmbushur standardet teknike të përcaktuara për këtë segment. Studimi do të përcaktojë përfundimisht gjurmën, nyjet lidhëse, si dhe infrastrukturën ndihmëse për zonat e banuara pranë tij.
Kërkesat teknike parashikojnë gjithashtu ndërtimin e mbikalimeve për këmbësorët, vendosjen e ndriçimit pranë nyjeve dhe zonave të banuara, si dhe plotësimin e të gjitha kritereve të sigurisë rrugore. Krahas këtyre, konsulenti do të duhet të evidentojë pronat që preken nga projekti, të llogarisë shpenzimet përkatëse për shpronësimet dhe të përcaktojë koston e përgjithshme të ndërtimit.
