30.5 C
Tirana
E hënë, 24 Qershor 2024

Injektimi i likuiditetit nga Banka e Shqipërisë ngelet në nivele të larta

Në muajin nëntor 2021, Këshilli Mbikëqyrës i Bankës së Shqipërisë paralajmëroi tërheqjen graduale të stimulit monetar.

Duhen Lexuar

Që nga fillimi i vitit të ardhshëm, forma aktuale e ankandeve për marrëveshjet e anasjellta të riblerjes, që mundëson akses të pakufizuar në likuiditet, do të ndërpritet. Kjo formë e injektimit të likuiditetit ishte në fuqi që prej shpërthimit të pandemisë, në muajin mars 2020. Në atë rast, Banka e Shqipërisë, përveçse uli normën e interesit të REPO-ve njëvore në minimumin e ri historik prej 0.5%, ndryshoi edhe formën e marrëveshjeve, nga ankand me shumë të fiksuar në ankand me çmim uniform. Ndryshimi i formës së ankandit u bë me qëllim për t’iu siguruar bankave akses të pakufizuar në likuiditet. Kjo qasje ka ndikuar në rritjen e përdorimit nga ana e bankave tregtare të instrumenteve afatshkurtra të likuiditetit të bankës qendrore.

Statistikat e Bankës së Shqipërisë tregojnë se shfrytëzimi i këtyre instrumenteve ngelet i lartë edhe në muajt e fundit të vitit 2021. Në fund të muajit nëntor, vlera e huasë nëpërmjet marrëveshjeve të anasjellta të riblerjes kishte vlerën e afërsisht 45 miliardë lekëve, në rritje me 7.6% krahasuar me muajin tetor dhe me 5.4% krahasuar me të njëjtën periudhë të një viti më parë. Vlera e huamarrjes është pranë nivelit më të lartë të post-pandemisë, që u shënua në fund të gushtit të këtij viti, kur vlera e huasë nga Banka e Shqipërisë arriti shumën e 46 miliardë lekëve. Kjo tregon që bankat do të vazhdojnë të shfrytëzojnë deri në fund aksesin e gjerë në likuiditet që ofron formula aktuale, që pritet të ndërpritet duke filluar nga janari i vitit të ardhshëm.

Huamarrja e bankave në Bankën e Shqipërisë zakonisht aplikohet nëpërmjet instrumentit të marrëveshjeve të anasjellta të riblerjes (REPO), ndërsa instrumentet e tjera, si për shembull kredia njëditore, kanë një përdorim më të rrallë. Sektori bankar shqiptar në tërësi është mjaft likuid sepse vetëm një pakicë e depozitave dhe detyrimeve të tjera janë dhënë kredi. Raporti mes kredive dhe depozitave (sipas raportimit IFRS) është më i ulët se 43%. Por, rritja e huamarrjes nga banka qendrore përmes instrumenteve javore tregon në thelb një nevojë më të lartë për likuiditet të përkohshëm. Shpesh, rritja e vlerës së REPO-ve lidhet me datat e zhvillimit të ankandeve të bonove apo obligacioneve nga Ministria e Financave. Për shkak të mospërputhjes ditore mes maturimit të instrumenteve ekzistues dhe instrumenteve të reja që emetohen, bankat mund ta mbushin boshllëkun disa ditor që krijohet në likuiditetin e tyre nëpërmjet huamarrjes nga Banka e Shqipërisë.

Burimi: Banka e Shqipërisë
- Reklama -
spot_img
- Reklama -

Artikujt e Fundit

WallStreet.al Deshirojme tju informojme per cdo artikull te ri qe publikojme ne web.
Dismiss
Allow Notifications