Mbetjet e rrezikshme do të ndiqen hap pas hap, nga momenti kur krijohen deri te destinacioni i tyre përfundimtar. Këtë synon një projektvendim i ri, i hedhur për konsultim publik. Dokumenti vendos rregulla më të qarta për identifikimin, ambalazhimin, transportin, magazinimin dhe dorëzimin e këtyre mbetjeve.
Nisma ka në qendër forcimin e kontrollit mbi të dhënat për mbetjet e rrezikshme. Ajo përcakton gjithashtu standardet që duhet të zbatojnë të gjithë operatorët e përfshirë në këtë zinxhir.
Identifikues unik elektronik në SIM
Projektvendimi kërkon që mbetjet të identifikohen dhe të klasifikohen saktë. Para grumbullimit, ato duhet të ambalazhohen në mënyrë të sigurt dhe të etiketohen. Gjurmueshmëria do të sigurohet përmes dokumentit të dorëzimit, i cili do të marrë një identifikues unik elektronik në Sistemin e Integruar Mjedisor (SIM).
Ky mekanizëm synon që çdo lëvizje e mbetjeve të rrezikshme të dokumentohet dhe të mund të kontrollohet. Ndjekja nis te krijuesi ose zotëruesi dhe mbyllet kur përfundon operacioni i rikuperimit ose i asgjësimit.
Magazinimi dhe transporti
Dokumenti cakton kushte dhe afate për magazinimin e përkohshëm. Qëllimi është të shmangen rrjedhjet, derdhjet, përzierja e mbetjeve të papajtueshme, zjarret dhe shpërthimet. Transporti i mbetjeve të rrezikshme do t’u nënshtrohet rregullave të veçanta. Dokumenti i dorëzimit do të ketë një formular të përcaktuar, që do të shërbejë si instrument për kontrollin dhe gjurmimin e tyre.
Detyrimet për bizneset
Për bizneset dhe operatorët ekonomikë që veprojnë në këtë sektor, nisma synon të qartësojë përgjegjësitë dhe detyrimet ligjore. Këto detyrime u përkasin krijuesve, zotëruesve, grumbulluesve, transportuesve, tregtarëve, agjentëve dhe subjekteve që marrin mbetjet në dorëzim.
Personat fizikë dhe juridikë që kryejnë veprimtari me mbetje të rrezikshme në datën kur vendimi hyn në fuqi do të kenë 6 muaj kohë për t’u përshtatur me kërkesat e reja.
Synimi përfundimtar i projektvendimit është rritja e sigurisë në menaxhimin e mbetjeve të rrezikshme, parandalimi i ndotjes dhe mbrojtja e shëndetit publik. Kjo do të arrihet përmes një sistemi administrimi më transparent dhe më të kontrollueshëm.
