Qeveria parashikon që turizmi të mbetet një nga shtyllat kryesore të ekonomisë shqiptare, me një kontribut prej rreth 33% në Prodhimin e Brendshëm Bruto gjatë periudhës 2027-2029. Ky objektiv përfshihet në relacionin e projektbuxhetit 2027, ku janë përcaktuar treguesit që ekzekutivi synon të arrijë në këtë sektor për tre vitet e ardhshme.
Punësimi dhe kapacitetet akomoduese
Dokumenti parashikon një rritje graduale të punësimit në turizëm, nga 8.6% në vitin 2026 në 8.7% në vitin 2027, për t'u stabilizuar në 8.8% gjatë viteve 2028-2029. Sa i përket kapaciteteve, numri i strukturave akomoduese synohet të arrijë 2,100 në vitin 2027 dhe 2,150 deri në vitin 2029.
Vëmendje i kushtohet edhe agriturizmit, ku qëllimi është që numri i bizneseve të zgjerohet nga 400 në vitin 2027 në 650 në fund të periudhës.
Flukset turistike dhe sitet kulturore
Për hyrjet e shtetasve të huaj në Shqipëri, projektbuxheti parashikon rritje nga 15.5 milionë në vitin 2027 në 16 milionë në vitin 2029. Ndërkohë, numri i vizitorëve në sitet kulturore synohet të arrijë 950 mijë në vitin 2027 dhe 980 mijë në vitin 2029.
Ndër objektivat e tjera është diversifikimi i produktit turistik, me synimin për të nxitur një turizëm gjithëvjetor dhe për të ulur përqendrimin e aktivitetit në sezonin veror.
