Kompanitë fituese të tenderëve publikë do të kenë të drejtë t'ua kalojnë nënkontraktorëve më shumë se gjysmën e vlerës së kontratës. Kjo parashikohet në një projektligj të propozuar nga qeveria për ndryshimin e ligjit “Për prokurimin publik”, i cili heq kufirin aktual prej 50% dhe ndërhyn njëkohësisht në rregullat për konkurrimin, ndryshimin e kontratave dhe ankimimin e procedurave.
Kontroll më i rreptë mbi nënkontraktorët
Heqja e tavanit vjen bashkë me detyrime të reja për monitorimin e nënkontraktorëve. Kompania fituese do të jetë e detyruar të njoftojë institucionin publik për çdo ndryshim gjatë zbatimit të kontratës, si dhe për çdo nënkontraktor të ri që përfshihet në punë.
Modifikime pa tender të ri
Ndryshimet prekin edhe kontratat që janë aktualisht në zbatim. Projektligji lejon modifikimin e tyre pa zhvilluar një procedurë të re, nëse vlera e ndryshimit nuk e kalon 10% të kontratës fillestare për mallrat dhe shërbimet, ose 15% për punët publike. Gjithashtu, kjo vlerë nuk duhet të tejkalojë kufirin e lartë monetar të prokurimit. Në këto raste, modifikimi nuk mund të ndryshojë natyrën e përgjithshme të kontratës, ndërsa ndryshimet e njëpasnjëshme do të llogariten të mbledhura.
Shfuqizohet dispozita për konsulencat ndërkombëtare
Projektligji shfuqizon dispozitën e miratuar në vitin 2024, e cila i jepte qeverisë mundësinë që, për një periudhë 3-vjeçare, të autorizonte institucione qendrore të negocionin drejtpërdrejt marrëveshje konsulence me subjekte ndërkombëtare në fusha strategjike. Ndër to përfshiheshin inteligjenca artificiale, siguria kibernetike, infrastruktura kritike dhe lufta kundër krimit të organizuar dhe korrupsionit. Sipas relacionit, heqja e këtij parashikimi është kërkuar nga Komisioni Evropian, pasi ai nuk përputhet me direktivat.
Kompanitë që përgatitin procedurat
Rregullohet edhe pjesëmarrja në tender e kompanive që kanë ndihmuar më parë në përgatitjen e procedurës. Institucioni publik duhet t'u vërë në dispozicion konkurrentëve të tjerë informacionin përkatës dhe kohë të mjaftueshme për përgatitjen e ofertave. Kompania e përfshirë do të skualifikohet vetëm kur trajtimi i barabartë nuk mund të sigurohet me masa të tjera.
Sipas relacionit shoqërues, ndryshimet synojnë përafrimin me direktivat e Bashkimit Evropian dhe zgjidhjen e problemeve të hasura në praktikë.