12.5 C
Tirana
E shtunë, 24 Shkurt 2024

Sondazhi i Ipsos, një në katër europianë thotë se pozita e tij financiare është “e pasigurt”

Duhen Lexuar

Studimi i një organizate joqeveritare kundër varfërisë tregon se më shumë se gjysma e europianëve ndihen në rrezik financiar dhe 80% e tyre tashmë kanë filluar të bëjnë zgjedhje të vështira për sa i përket shpenzimeve.

Një në katër europianë e përshkruan pozicionin e tij financiar si “të pasigurt”, më shumë se gjysma e tyre vlerësojnë se ky do të bëhet një rrezik serioz që do të përkeqësohet gjatë muajve të ardhshëm dhe 80% e tyre tashmë janë detyruar që të fillojnë të bëjnë zgjedhje të vështira për sa i përket shpenzimeve, sipas një sondazhi.

Ndërsa kriza e kostos së jetesës, e cila është nxitur nga çmimet e larta të energjisë, nga inflacioni i shfrenuar dhe nga lufta e Rusisë kundër Ukrainës, është duke zënë rrënjë kudo në Europë, një sondazh në gjashtë vende për organizatën joqeveritare franceze kundër varfërisë, Secours Populaire, ofroi një pamje tepër alarmante të “një kontinenti në prag të një krize të rëndë”.

Më shumë se gjysma (54%) e pothuajse 6,000 njerëzve në të gjithë Francën, Gjermaninë, Greqinë, Italinë, Poloninë dhe Mbretërinë e Bashkuar u përgjigjën për kompaninë e sondazheve, Ipsos, se fuqia e tyre blerëse kishte rënë gjatë tre viteve të fundit – kryesisht për shkak të rritjes së kostove të ushqimit, të karburantit, të ngrohjes dhe të faturave të qirasë.

Vendi më i goditur nga rritjet e çmimeve ishte Greqia, ku 68% e të anketuarve thanë se fuqia e tyre blerëse kishte rënë “shumë” ose “disi” që nga viti 2019. Kjo shifër ishte 63% për Francën, 57% për Italinë, 54% për Gjermaninë, 48% për Britaninë dhe 38% për Poloninë.

Rreth 80% e të anketuarve thanë se ishin detyruar që të fillonin të bënin kompromise të vështira, duke përfshirë reduktimin e sasisë të udhëtimeve (62%) ose të ngrohjes (47%), marrjen e borxhit nga miqtë ose nga familja (42%), gjetjen e një pune të dytë (40%), e deri tek anashkalimi i një vakti në ditë (29%).

Në të gjashta vendet e përfshira në këtë sondazh, 64% e të anketuarve thanë se ata “shpesh” ose “ndonjëherë” nuk janë në gjendje të vendosin se çfarë do të reduktojnë tjetër nga shpenzimet e tyre, pasi tashmë kanë bërë gjithçka që mundin, 28% thanë se tashmë ishin shumë ngushtë financiarisht që në mesin e muajit, ndërsa 27% kishin frikë “shpesh” ose “ndonjëherë” se mund të humbisnin shtëpinë e tyre.

Mesatarisht, rreth 27% e të anketuarve në të gjashta vendet thanë se gjendja e tyre financiare dhe materiale ishte “e pasigurt”, që do të thotë se “një shpenzim i papritur mund të ndryshojë gjithçka”, ndërsa 55% e të anketuarve thanë se tashmë duhet të ishin shumë më të vëmendshëm për shpenzimet e tyre.

Megjithatë, e ardhmja dukej më e keqe për shumë njerëz: shumica e europianëve (55%) thanë se mendonin që përballeshin me një rrezik të madh ose disi të rëndësishëm për të qenë në pasiguri financiare gjatë muajve të ardhshëm – me një të pestën e tyre (17%) që e vlerësonin këtë mundësi si shumë të lartë.

Italianët dhe grekët ishin ata më të shqetësuarit, me 70% dhe 68% respektivisht që deklaruan se janë “shumë” ose “disi” të shqetësuar. Rreth 47% e të anketuarve në Britani thanë se mendonin që rreziku i pasigurisë ishte i rëndësishëm, ndërsa për Francën kjo shifër ishte 42%.

Prindërit në veçanti po ndjenin vështirësi financiare, sipas rezultateve të sondazhit. Një shumicë e konsiderueshme (72%) në të gjashta vendet europiane thanë se kishin reduktuar aktivitetet e tyre të kohës së lirë (76%), trajtimet e flokëve dhe të bukurisë (72%), si dhe buxhetin e rrobave (72%), në mënyrë që të mund të ruanin cilësinë e jetesës së fëmijëve të tyre.

Pothuajse gjysma e prindërve (48%) në të gjashta vendet thanë gjithashtu se po reduktonin rregullisht sasinë e ushqimit të tyre në mënyrë që të ushqenin fëmijët, ndërsa 66% deklaruan se ishin detyruar që të ndërprenin disa nga aktivitetet e fëmijëve të tyre, duke përfshirë daljet për argëtim dhe pushimet.

Mesatarisht, 49% e prindërve thanë se ishin të shqetësuar se nuk do të ishin në gjendje që të plotësonin nevojat e fëmijëve të tyre në të ardhmen, ndërsa 33% deklaruan se ata që tani nuk ishin në gjendje të siguronin që dieta e fëmijëve të tyre të ishte aq e larmishme sa do të dëshironin.

Studimi zbuloi disa diferenca të rëndësishme midis vendeve përsa i përket grupeve që konsideroheshin më të rrezikuara për të rënë në varfëri: pensionistët në Gjermani (61%), të rinjtë në Itali (57%) dhe familjet me një prind në Mbretërinë e Bashkuar (55%)./ The Guardian

Postimi ” Sondazhi i Ipsos, një në katër europianë thotë se pozita e tij financiare është “e pasigurt” ” eshte marre nga Revista Monitor.

- Reklama -
spot_img
- Reklama -

Artikujt e Fundit