Rreth 198 hektarë fond pyjor në bashkitë Kolonjë dhe Pogradec janë dhënë në përdorim ose janë përfshirë në procedura për aktivitete ekonomike gjatë periudhës 2023–2025. Sipas të dhënave nga një raport i organizatës All Green Centre, e cila ka monitoruar bashkitë Kolonjë, Pogradec dhe Korçë, pjesa më e madhe e kësaj sipërfaqeje i përket bashkisë së Kolonjës, ku dominojnë projektet për prodhimin e energjisë nga dielli dhe era.
Në Kolonjë janë evidentuar mbi 183 hektarë fond pyjor të përfshirë në procedura për përdorime ekonomike, ku rreth 136 hektarë lidhen drejtpërdrejt me energjinë e rinovueshme. Gjatë tre viteve të monitoruara janë identifikuar pesë procedura për centrale fotovoltaike dhe një për ndërtimin e një centrali eolik së bashku me infrastrukturën mbështetëse. Raporti vëren një lidhje të dobët midis këtyre zhvillimeve dhe planifikimit vendor, pasi dokumentet e Kolonjës e orientojnë ekonominë nga bujqësia, blegtoria dhe turizmi, pa zona të dedikuara posaçërisht për projekte energjetike në sistemin natyror.
Në Pogradec, monitorimi ka konstatuar tri raste që mbulojnë gjithsej 14,84 hektarë, të cilat janë destinuar për agropylltari, ngritjen e një fidanishteje dhe veprimtari kërkim-zbulimi. Ndërkohë, në bashkinë e Korçës nuk është identifikuar asnjë procedurë konkurruese për dhënien në përdorim të fondit pyjor gjatë periudhës së shqyrtuar.
Përveç procedurave dhe planifikimit, analiza trajton edhe ndikimet mjedisore që mund të shkaktohen nga heqja e vegjetacionit, hapja e rrugëve dhe instalimi i infrastrukturës, të cilat rrezikojnë të sjellin humbje ose fragmentim të habitateve, ndryshime në peizazh dhe rritje të erozionit të tokës. Për zonat me përqendrim të lartë investimesh si Kolonja, kërkohet një vlerësim i përbashkët i efekteve të tyre.
All Green Centre rekomandon qartësimin e rregullave për përdorimin e fondit pyjor dhe shqyrtimin e alternativave të vendndodhjes përpara se sipërfaqet t'i vihen në dispozicion investitorëve, duke theksuar se planifikimi paraprak është thelbësor për të harmonizuar zhvillimin energjetik me ruajtjen e pyjeve dhe ekonomitë lokale.
