Protestat që kanë përfshirë Tiranën dhe disa qytete të tjera të Shqipërisë prej 9 ditësh nuk kanë ndikuar në planet e udhëtimit të qytetarëve. Agjencitë turistike deri tani nuk kanë marrë kërkesa për anulimin e fluturimeve, ndërsa turistët e huaj vazhdojnë të vizitojnë vendin.
Ndryshimi kryesor që vërehet është kujdesi më i madh i udhëtarëve në zgjedhjen e destinacioneve, të cilët po shmangin zonat ku ka tensione.
Asnjë kërkesë për anulim
Operatorja turistike Fjorida Zani konfirmon se klientët e saj kanë udhëtuar normalisht dhe pa probleme.
“Nuk kemi pasur anuline domethënë, njerëz që kanë kërkuar t'ju anullojmë fluturimin e tyre, përkundrazi, kanë shkuar dhe nuk kanë pasur ndonjë problem. Dhe për këtë jemi të kënaqur, por jo se e ka frenuar për të anuluar fluturimin e tyre. Kemi pasur dhe klientë që sapo janë kthyer nga Bolonja dhe nuk kanë pasur probleme, thjesht kanë shmangur këto vende ku bëhen protestat dhe çdo gjë ka shkuar mirë”
Budapesti dhe Italia ndër zgjedhjet kryesore
Për sa u përket preferencave, udhëtarët po orientohen drejt vendeve ku situata duket më e qetë. Budapesti dhe disa qytete italiane mbeten ndër alternativat më të kërkuara, ndërsa informimi paraprak për gjendjen në destinacion po ndikon gjithnjë e më shumë në vendimet e tyre.
“Po udhëtojnë në këto vende, normalisht që po zgjedhin ato që nuk ka trazira, po marrim informacion, Budapestin, patjetër edhe një pjesë e Italisë, po jo këto zonat që kanë filluar së fundmi që të kenë rrëmujë si gjithë Europa, por ka pasur Europa kryesisht”
Kështu tha Zani, duke theksuar se pavarësisht situatës së krijuar nga protestat, agjencia nuk ka regjistruar anulime. Shmangia e zonave të tensionuara dhe marrja e informacionit përpara nisjes mbeten faktorët kyç për turistët dhe udhëtarët shqiptarë.
