Qeveria greke po rishikon projeksionet e saj për rritjen ekonomike dhe inflacionin në vitin 2023 në kahun rënës, pas një përkeqësimi të parashikimeve të Komisionit Europian. Lufta në Ukrainë dhe kriza e energjisë hedhin një hije të rëndë mbi ekonominë europiane, ndërsa rritja e normave të interesit nga Banka Qendrore Evropiane ndilkon në uljen e Prodhimit të Brendshëm Bruto.
Parashikimet e reja të qeverisë greke do të përfshihen në buxhet, që pritet të miratohen në parlament deri më 20 nëntor. Në projektbuxhetin e fillimit të tetorit, qeveria parashikoi për vitin 2023 një rritje prej 2.1% dhe inflacion 3%. Tani, ajo sheh uljen e PBB-së, por jo duke shkuar në territor negativ, siç parashikohet të ndodhë në nivelin e Eurozonës.
Sipas ministrit të Financave, Christos Staikouras, për vitin 2022 inflacioni do të regjistrohet rreth 10%, kundrejt parashikimit të buxhetit për 8.8%. Për PBB-në këtë vit, Ministria e Financave nuk ka vendosur ende të ndryshojë parashikimin e tij për një ritëm 5.3%, ndonëse kohët e fundit ka pasur vlerësime prej 6%.
Qeveria është e vendosur të ruajë objektivin për një deficit primar jo më shumë se 1.7% të PBB-së dhe mendon se është një sinjal i fortë besimi për tregjet. Në këtë mënyrë, Ministria e Financave është e përmbajtur përsa i përket perspektivës së masave të reja mbështetëse këtë vit, pasi çmimet e energjisë nuk i imponojnë për momentin.
Sektori tek i cili shpreson qeveria për vitin 2023 janë investimet. Aktualisht, janë kontraktuar 8.2 miliardë euro investime dhe janë në faza të ndryshme nën kredinë e Fondit të Rimëkëmbjes, ndërsa tashmë janë miratuar dhe kontraktuar 1.8 miliardë euro. Gjithashtu, në vitin 2023 do të aktivizohen edhe investimet e tjera të Fondit të Rimëkëmbjes, si agroturizmi, ndërkohë që me vlerë të konsiderueshme janë edhe Programi i Investimeve Publike dhe Partneritetet Publike dhe Private të nisura.
SCAN
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
