Investimet e reja të individëve në titujt e qeverisë shqiptare pësuan rënie për të tretin vit radhazi në vitin 2025. Të dhënat e Autoritetit të Mbikëqyrjes Financiare (AMF) treguan se për vitin e kaluar, blerjet e individëve në tregun primar të bonove dhe obligacioneve ranë në 23.8 miliardë lekë, në rënie me 16.5% krahasuar me vitin 2024.
Rënie u shënua edhe në numrin e transaksioneve, që zbriti në 7299, me një rënie vjetore prej 24.4%.
Sipas llojit të instrumenteve financiare, peshën kryesore vazhdon ta mbajë investimi në bono thesari. Shifrat e AMF-së tregojnë se vlera e blerjeve të bonove në tregun primar zbriti në 18.6 miliardë lekë, me rënie vjetore prej 18.1%. Ndërkohë, investimi në obligacione u tkurr në 5.2 miliardë lekë, 10.2% më pak krahasuar me vitin 2024.
Të dhënat e mësipërme u referohen transaksioneve të kryera nëpërmjet ndërmjetësve financiarë të licencuar nga AMF, kryesisht bankave tregtare. Megjithatë, investimi në bono thesari mund të kryhet edhe nëpërmjet sporteleve të posaçme të Bankës së Shqipërisë.
Sipas të dhënave më të fundit të Ministrisë së Financave, në fund të vitit 2025 vlerësohej se
individët zotëronin 18.53% të instrumenteve të borxhit të brendshëm, nga 19.8% në fund të vitit 2024.
Sipas të dhënave nga AMF-ja, rënie pësuan edhe investimet e individëve në tregun dytësor. Blerjet e tyre nga portofolat e ndërmjetësve financiarë ranë në 1.88 miliardë lekë, 60% më pak krahasuar me një vit më parë.
Në Shqipëri veprojnë aktualisht dhjetë shoqëri komisionere që mundësojnë investimin në titujt e qeverisë shqiptare, prej të cilave nëntë janë banka tregtare.
Burimi: AMF
Rënia e investimit të individëve në bono dhe obligacione vlerësohet të ketë ardhur kryesisht si rezultat i rënies së mëtejshme të yield-eve.
Sipas të dhënave nga Ministria e Financave, yield-i mesatar për të gjitha letrat me vlerë të borxhit të emetuara në tregun e brendshëm në fund të vitit 2025 ra në 4.23%, nga 4.56% në fund të vitit 2024.
Rënia ka vazhduar edhe në gjysmën e parë të këtij viti. Në fund të qershorit, yield-i mesatar për të gjitha letrat me vlerë të borxhit të emetuara në tregun e brendshëm ra më tej në 4.18%. Aktualisht, yield-i mesatar i borxhit të brendshëm ka arritur nivelin më të ulët të katër viteve të fundit.
Burimi: Ministria e Financave
Por muajt e fundit tregojnë një tendencë në rritje të yield-eve
Megjithatë, duke filluar nga tremujori i dytë i këtij viti, yield-et po shfaqin tendenca në rritje, në vijim të rritjes së inflacionit dhe pritshmërive më të larta që Banka e Shqipërisë të rrisë normat e interesit. Ankandet e fundit të obligacioneve afatgjata kanë shfaqur të gjitha rritje të yield-eve.
Në ankandin e fundit të zhvilluar, në maj të këtij viti, obligacionet 20-vjeçare u emetuan me një yield prej 6.5% (minimum historik), nga 6.2% që kishte qenë në ankandin e muajit mars.
Obligacionet 20-vjeçare qëndrojnë afërsisht në të njëjtin nivel me një vit më parë, por tendenca duket të jetë drejt një rritjeje të mëtejshme.
Obligacionet 15-vjeçare në ankandin e fundit, të zhvilluar në muajin korrik, kishin një yield uniform të pranuar prej 6.35%, nga 5.95% një vit më parë.
Obligacionet 10-vjeçare, në ankandin e fundit, të zhvilluar në muajin korrik, rezultuan me një yield uniform të pranuar prej 5.4%, në rritje për të dytin ankand radhazi. Yield-i i këtyre instrumenteve është në rritje në raport me nivelin prej 5.05% të një viti më parë dhe tendenca gjithashtu duket në rritje të mëtejshme.
Burimi: Banka e Shqipërisë
Burimi: Banka e Shqipërisë
Burimi: Banka e Shqipërisë
Tendenca në rritje duket qartë edhe në serinë e yield-it të titujve referencë 5-vjeçarë. Titujt referencë janë pjesë e projektit të Bankës së Shqipërisë dhe Ministrisë së Financave, ku pjesëmarrja në ankandet e tregut primar mund të bëhet vetëm nëpërmjet bankave zhvilluese të tregut.
Këto banka janë të detyruara të publikojnë një yield ditor për tregtimin dytësor të titujve. Mesatarja e yield-it të zhvilluesve të tregut publikohet me bazë ditore nga Banka e Shqipërisë.
Të dhënat tregojnë se yield-i po shënon një tendencë në rritje që prej tremujorit të dytë, ndërsa rritja është theksuar sidomos pas muajit korrik.
Burimi: Banka e Shqipërisë
LEXONI EDHE:
Alternativat e investimit: Në pritje të rritjes së interesave
Postimi ” Rënia e yield-eve tkurri më tej investimet e reja në bono ” eshte marre nga Revista Monitor.
