Renditja e kompanive më të mëdha në vend, sipas qarkullimit vjetor, “Monitor 200”, për vitin 2023. Rritja e të ardhurave u ngadalësua për shumë sipërmarrje. Ekonomia thelloi problemet e saj strukturore, duke shtuar varësinë nga importet, teksa Euro po godet gjithnjë e më shumë sipërmarrjet prodhuese dhe eksportuese. Ndryshimet demografike dhe emigracioni po shkaktojnë zhbalancime të mëdha në tregun e punës, që vetëm sa vijnë e thellohen. Bizneset duket se po dorëzohen gjithnjë e më shumë përballë kësaj situate, teksa në mungesë të fuqisë punëtore dhe përballë kostove në rritje, po shfaqen pesimiste për zgjerimin dhe investimet në të ardhmen
Ornela Liperi
Një mjedis ekonomik i vështirë ka dhe anën e vet pozitive, i bën bizneset, por dhe individët më elastikë dhe të përshtaten me shpejtësi ndaj çdo sfide. Kjo duket se ka qenë historia e sipërmarrjeve shqiptare në tri dekadat e fundit.
Pas piramidave të 97-s, ekonomia e mori veten shpejt. Kursimet që humbën nga skemat u rikuperuan brenda një viti në sistemin bankar. Kriza financiare mbarëbotërore e vitit 2008-2009 nuk na preku shumë edhe si rrjedhojë e administrimit të mirë të brendshëm të ndikimit të saj në sistemin bankar.
Rimëkëmbja ishte e shpejtë pas pandemisë, ndërsa periudha që pasoi me rritjen e çmimeve, e ndikuar dhe nga sulmet e Rusisë ndaj Ukrainës, solli më shumë fitime për sipërmarrjet.
Në dekadat e tranzicionit ka qenë dinamizmi i biznesit si dhe hapja ekonomike e lidhja fizike me Kosovën që ka çuar përpara ekonominë e Shqipërisë, duke mposhtur brishtësinë dhe politikën e keqe.
Por, ky dinamizëm ka pasur si forcë orientuese kryesore kapitalin njerëzor dhe fuqinë blerëse konsumatore, me ekonominë që vitet e fundit është orientuar kryesisht nga shërbimi dhe ndërtimet. Të dy këto themele, forca punëtore dhe fuqia blerëse po lëkunden, si rrjedhojë e emigracionit të fortë, sidomos pas pandemisë.
Censi i fundit i INSTAT gjeti se ka 420 mijë persona më pak se në vitin 2011. Për një ekonomi të vogël, kjo do të thotë se gati një e shtata e popullsisë është larguar, me pasoja të rënda si në gjetjen e fuqisë punëtore, kryesisht të të rinjve, ashtu dhe në konsum.
Burimi: INSTAT
Në vitin 2023, ekonomia u ngadalësua, duke u rritur me 3.45%, pas një zgjerimi prej 4.9% në vitin e mëparshëm. Sërish, ashtu si në tre vitet e mëparshme, rritja u nxit në pjesën më të madhe nga lulëzimi i aktivitetit të pasurive të paluajtshme, e ndërtimi.
Kthimi i Shqipërisë në një destinacion turistik nuk arriti ta amortizonte tërësisht rënien e konsumit nga vendasit, për shkak të emigracionit dhe uljes së fuqisë blerëse pas periudhës me inflacion të lartë.
Burimi: INSTAT
Pas një inflacioni të lartë në vitin 2022, që arriti në 6.2%, më i larti nga 1998-a, në vitin 2023, presionet u lehtësuan disi, sidomos në gjysmën e dytë të vitit, duke zbritur në një mesatare vjetore prej 4.8%.
Por, ndryshe nga viti 2022, kur rritja e çmimeve “ndihmoi” bizneset që të shtonin të ardhurat, me pjesën më të madhe të tyre që raportuan rritje dyshifrore të qarkullimit vjetor, performanca ishte shumë më e ngadaltë në vitin 2023.
Burimi: INSTAT
Xhiroja e 200 kompanive më të mëdha në vend, në vitin 2023, në renditjen e përvitshme të “Monitor 200” ishte 1.4 trilionë lekë (rreth 14 miliardë euro), me rënie prej rreth 6% në raport me 200 kompanitë më të mëdha në vitin 2022.
Kjo është hera e parë që xhiroja e 200 më të mëdhenjve është në rënie, që nga periudha e pandemisë. Një vit më parë, rritja kishte qenë shumë më e fortë, në 24%.
Tkurrja e të ardhurave e 200 kompanive më të mëdha u ndikua kryesisht nga rënia e qarkullimit vjetor të sipërmarrjeve të tregtimit të energjisë dhe të tregtimit të naftës, si rrjedhojë e rënies së çmimeve, zhvlerësimit të Euros me rreth 8.5% në 2023 me bazë vjetore, por dhe rritja më e ngadaltë e kompanive që veprojnë në segmentin e shpërndarjes së produkteve për konsum.
Ekonomia vijoi të vuajë pasojat e një mjedisi jokonkurrues, në shumë raste favorizues për një pakicë, pak investime në teknologji e orientim nga importi, mungesë të investimeve të huaja cilësore dhe vlerë të shtuar të ulët e pagat më minimale në Europë.
Emigracioni dhe ndryshimet në trendet demografike, sa vijnë e po bëhen një faktor gjithnjë e më pengues.
Mungesa e fuqisë punëtore, e kualifikuar dhe e pakualifikuar, po kthehet në një pengesë reale të bizneseve, si për projektet e tyre të zgjerimit, edhe në përmirësimin e produktivitetit, teksa presioni për rritjen e pagave është i lartë, duke shtuar shpenzimet, pa ndikim real tek eficienca e ndërmarrjeve.
Edhe tregu i punës nuk po sjell zgjidhje të besueshme për fuqi punëtore nga jashtë dhe për më tepër, kuadri ligjor për këtë lloj zgjidhje është ende i brishtë dhe i paqëndrueshëm.
Bizneset duket se po “dorëzohen” përpara këtyre dy faktorëve. Në raportet e aktivitetit të dorëzuara për vitin 2023 konstatohet presioni që ata po ndiejnë për të mbajtur punonjësit, ndërsa shtimi i personelit është në nivele minimale.
Edhe planet e investimeve janë lënë pezull, në pritje të zhvillimeve në të ardhmen sipas deklarimeve të sipërmarrjeve, kryesisht prodhuese, në raportet e tyre të aktivitetit. Përjashtim bëjnë projektet e ndërtimit, që pritet të vijojnë me vrull, ndonëse sektori po shfaq shenja të qarta maturimi.
Modeli rastësor i zhvillimit të ekonomisë tashmë duket se është kthyer në pengesë, me hapësirat për të bërë biznes që sa vijnë e ngushtohen.
Ekonomia po vuan gjithnjë e më fort pasojat e problemeve të saj strukturore, si varësia e lartë nga importet; konkurrueshmëria e ulët e industrisë përpunuese që u bë dhe më e brishtë ndaj importeve; niveli i ulët i sofistikimit dhe vlera e ulët e shtuar e eksportuesve, që i bëri ata më të brishtë ndaj luhatjeve të monedhave; orientimi drejt industrive joproduktive si ndërtimi, që nuk bën asgjë për të ndihmuar në raste krizash; investimet e pakta në teknologjinë e informacionit, që mund të shërbenin si amortizator; si dhe ekonomia informale, që është aq e lartë saqë arrin të zhbalancojë të gjithë treguesit ekonomikë!
Mjedisi i vështirë ekonomik po mban larg investimet e huaja (përveç atyre në blerjen e pasurive të paluajtshme), të cilat do të sillnin njohuri dhe vende më të mira pune. Departamenti Amerikan i Shtetit (DASH), në raportin e vitit 2024 për klimën e investimeve të Shqipërisë, thekson se zhvillimi ekonomik mbetet i brishtë nga korrupsioni i përhapur, konkurrenca e shtrembëruar dhe mungesa e vazhdueshme e fuqisë punëtore.
Shqipëria ka gjithashtu një sektor të madh informal. Vendi vuan nga fenomeni i pastrimit të parave. Sipas DASH, komuniteti i biznesit raporton se fluksi i madh i të ardhurave të paligjshme nga trafiku i drogës, kontrabanda, evazioni fiskal dhe korrupsioni shtrembëron konkurrencën në treg.
Elasticiteti që i ka mbajtur sipërmarrjet në këmbë po dobësohet përballë tkurrjes së popullsisë, ndërsa modeli rastësor i zhvillimit të ekonomisë po kthehet tashmë në një faktor pengues. Ekonomia mbetet e varur nga konsumi që po bie.
Ndërtimet, që nxitën rritjen për disa vite radhazi, duket se po arrijnë maturimin, me disa sipërmarrje që veprojnë në sektorin rezidencial, të cilat në vitin 2023 raportuan rënie të të ardhurave. Rritja e kostove dhe e pagave, e pashoqëruar nga produktiviteti, po nxjerr jashtë loje industrinë përpunuese dhe po e bën ekonominë gjithnjë e më të varur nga importet dhe më pak konkurruese. Euro e dobët po i jep goditjen e fundit eksportuesve, teksa po ndikon ndjeshëm turizmin, sektorin që po ecte më mirë vitet e fundit.
Qeveria, me trajtimin e saj sipërfaqësor të problemeve reale të vendit, nuk po ndihmon aspak. Asnjë reagim nuk ka pasur deri tani për rezultatet e censit dhe pasojat që tkurrja e popullsisë do të sjellë në ekonomi në afatin e mesëm e të gjatë.
Edhe në vitin 2023, në renditjen e 200 më të mëdhave, mbizotërojnë sipërmarrjet tregtuese e shpërndarëse, që kanalizojnë importet pranë konsumatorit lokal. Vetëm një duzinë kompanish kanë aktivitet në industrinë përpunuese.
Eksportuesit po vuajnë rënien e Euros, që u ka ulur të ardhurat në monedhën vendase, duke dalë nga lista e të mëdhenjve. Industria mbështetëse e prodhimit të pjesëve të automjeteve, e vetmja që po tërhiqte investime dhe kishte ecuri të mirë deri në vitin 2022, në vitin 2023 vuajti pasojat e rënies së Euros. Sipërmarrjet e tregtimit të karburanteve, me shumicë e pakicë, mbizotërojnë në renditjen e “Monitor 200”.
Distributorët, që në pjesën më të madhe financojnë importin, sërish zënë një vend kryesor. Sipërmarrje të tjera kanë thjesht aktivitet tregtar. Ndërtimi, sidomos ai rezidencial, po vazhdon rritjen. Numri i hyrjeve të reja nga ky sektor në renditjen e “Monitor 200” ka vijuar të jetë i lartë edhe në 2023. Një e pesta e sipërmarrjeve ndër 200 më të mëdhatë operojnë në ndërtim ose sektorët mbështetës.
Kompanitë e tregtimit të energjisë, që në vitin 2022 shënuan rritje të fortë për shkak të çmimeve të larta, u janë rikthyer niveleve normale në 2023. Dy prej tyre kanë dalë nga lista e top 10, ku hynë vitin e kaluar. E njëjta tendencë u shënua dhe për kompanitë e tregtimit të karburanteve, por që gjithsesi vazhdojnë të mbizotërojnë me 4 nga 10 sipërmarrjet më të mëdha, sipas të ardhurave në vend.
Zhvillimi më pozitiv në renditjen e “Monitor 200” është rritja e kompanive që ofrojnë shërbime për të tretët në fushën e teknologjisë së informacionit, që po zëvendësojnë kompanitë tradicionale të thirrjeve telefonike “call center”, duke u kthyer në një burim punësimi për të rinjtë dhe profesionistët e IT-së.
Nga 200 sipërmarrjet më të mëdha, sipas qarkullimit vjetor, 83% e tyre raportuan rritje të xhiros në 2023, (kundrejt 85% vitin e mëparshëm). Për 40% të sipërmarrjeve të renditura në “Monitor 200”, zgjerimi ishte dyshifror (kundrejt 63% vitin e mëparshëm).
17% e kompanive deklaruan rënie të të ardhurave në vitin 2023, në raport me vitin e mëparshëm, të ndikuara nga rënia e çmimeve dhe zhvlerësimi i euros.
Kufiri i qarkullimit vjetor i subjekteve që kanë hyrë tek 200 më të mëdhenjtë, është rreth 2.2 miliardë lekë, nga 2.1 miliardë lekë vitin e mëparshëm.
Tipike në renditjen e të mëdhave janë kompanitë që deklarojnë xhiro të lartë vjetore, por kanë shumë pak punonjës. Më shumë sesa një revolucion teknologjik, kjo lidhet me llojin e aktivitetit tregtar, që qarkullon shuma të mëdha nëpërmjet aktivitetit të rishpërndarjes apo shitblerjes, por realisht ka ndikim të ulët në vlerën e shtuar të ekonomisë dhe punësim.
“Monitor 200” ka hartuar, si çdo vit, renditjen e 200 sipërmarrjeve më të mëdha në vend, sipas të ardhurave, bazuar në listën emërore të subjekteve të mëdha të marra nga Tatimet dhe xhirot e deklaruara nga subjektet, në bilancet e dorëzuara në Qendrën Kombëtare të Biznesit (QKB) dhe të dhënave nga vetë kompanitë, të cilat nuk e kanë dorëzuar ende bilancin në QKB.
Në numër mbizotërojnë subjektet me aktivitet në fushën e tregtisë, të ndjekura nga ndërtimi, financa, nafta, industria përpunuese.
Në listën e 200 më të mëdhenjve ka 44 shoqëri ndërtimi, ose të lidhura direkt me të, 22 kompani që tregtojnë karburant me shumicë e pakicë, 27 janë në aktivitetin e tregtimit me shumicë e pakicë. Nga sektori i industrisë janë 20 shoqëri.
10 KOMPANITË MË TË MËDHA NË VEND
1. “OSHEE Group”
Nga viti 2020, Operatori i Shpërndarjes së Energjisë Elektrike (OSHEE), kompania më e madhe në vend, në pronësi publike, u shndërrua në Korporatën e parë Publike Shqiptare, duke pasur në pronësi tri shoqëri, Furnizuesin e Shërbimit Universal, Furnizuesin e Tregut të Lirë dhe Operatorin e Sistemit të Shpërndarjes (OSSH).
Të tria kompanitë kanë filluar të operojnë si të veçanta nga 1 janari 2020, pas ndarjes së funksioneve. Të tria shoqëritë figurojnë në listën e 10 më të mëdhave sipas qarkullimit vjetor, por xhiroja e tyre është e dubluar, për shkak të veprimeve me njëra-tjetrën.
Sipas të dhënave zyrtare të buxhetit faktit të Ministrisë së Financave, qarkullimi vjetor i të tria kompanive, duke netuar vlerat e të ardhurave nga aktiviteti i shoqërive brenda grupit ishte rreth 75 miliardë lekë në vitin 2023, pothuajse në të njëjtat nivele me vitin e mëparshëm, duke u renditur në sipërmarrjen më të madhe në vend.
Enea Karakaçi, administrator i Operatorit të Shpërndarjes së Energjisë Elektrike (OSHEE) tha se viti 2023 kishte në fokus konsolidimin e situatës financiare të shoqërisë, pas dy viteve të krizës, dhe rikthimin e investimeve në rrjet, me qëllim rritjen e cilësisë së furnizimit në gjithë Shqipërinë, por edhe në zonat me rëndësi strategjike turistike. “Gjatë vitit 2023 u realizua një ulje humbjesh rekord, në nivelin 18.93%.
Po ashtu, edhe arkëtimet mbajtën të njëjtin ritëm, në nivelin rreth 99%. Gjithashtu, përmirësuan treguesit teknikë të cilësisë së shërbimit të shpërndarjes, si rrjedhojë e investimeve dhe mirëmbajtjes së rrjetit elektrik, nëpërmjet fondeve me vlerë 4 miliardë lekë”.
2. “Kastrati Group”
Kompania më e madhe e importit dhe tregtimit të naftës me shumicë, “Kastrati Group”, ka zbritur në vendin e dytë në listën e “Monitor 200”, që i rendit sipërmarrjet sipas të ardhurave vjetore. Shoqëria raportoi 69.5 miliardë lekë qarkullim vjetor, me rënie prej 25.4% në raport me vitin e mëparshëm, pas rritjes së fortë prej 51% në 2022.
Këto luhatje të mëdha lidhen me ecurinë e çmimeve të naftës në bursat ndërkombëtare dhe kursit të këmbimit, që reflektohen dhe në tregun vendas.
Vitet e fundit, grupi “Kastrati” është diversifikuar edhe në ndërtim e hoteleri dhe sidomos në ndërtim e operim në infrastrukturë [me një seri projektesh të tilla (porti MBM), (Aeroporti Rinas) dhe autostrada (Rruga e Kombit, me 50% të aksioneve)].
Z.Shefqet Kastrati, President i “Kastrati Group” pohon se secila kompani ka pasur një performancë të mirë, duke shënuar rritje në të ardhura. “Trendi pozitiv ka vijuar edhe përgjatë vitit 2024, ku rezultatet e 6 mujorit të parë reflektojnë një rritje të mëtejshme të të ardhurave”. Ai shton se grupi do të fokusohet gjithashtu në fushën e turizmit dhe specifikisht atë të hotelerisë, ku aktualisht jemi angazhuar në projektet e dy hoteleve të mëdha ndërkombëtare si Hyatt Regency dhe Hilton Tirana. “Ne jemi duke parë mundësinë për investime edhe në jug të Shqipërisë, duke besuar se turizmi është një nga burimet kryesore të zhvillimit ekonomik të vendit”.
3. Korporata Elektroenergjetike Shqiptare (Sh.a KESH)*
“Korporata Elektroenergjetike Shqiptare (Sh.a. KESH)” renditet për të tretin vit radhazi në listën e 10 më të mëdhave, duke u ngjitur në vend të tretë. Në vitin 2023, të ardhurat u rritën me 14.2%, në 42 miliardë lekë, sipas të dhënave të buxhetit faktik të Ministrisë së Financave.
“Viti 2023 ishte një periudhë me aktivitet intensiv për Korporatën dhe sektorin elektroenergjetik në përgjithësi. Ndërkohë që çmimet e energjisë ishin relativisht të qëndrueshme në periudhën 2010-2020, vitet 2021 dhe 2022 panë rritje të paprecedentë të çmimeve.
Megjithatë, në vitin 2023, çmimet ranë dhe u stabilizuan, duke lehtësuar presionin mbi ekonominë globale dhe duke ulur ekspozimin e Korporatës ndaj rreziqeve që paraqet tregu i energjisë nga çmimet e larta”, pohon Erald Elezi, Administrator Korporata Elektroenergjetike Shqiptare.
Ai shton se viti 2023 rezultoi vit i favorshëm hidrik duke stimuluar aktivitet shfrytëzues dhe gjenerues të shtuar, ku Korporata arriti të përballojë më me lehtësi dhe siguri përgjegjësitë ndaj situatës së emergjencës në furnizimin me energji elektrike.
“Po kështu, edhe situata e çmimeve të stabilizuara në tregjet globale të energjisë favorizuan një aktivitet të ndjeshëm pozitiv për korporatën gjatë vitit 2023.
Pavarësisht kësaj situate pozitive, KESH u kujdes për menaxhimin sa më eficient të Kaskadës së Drinit dhe gjithashtu, duke zhvilluar aktivitetin e përgjithshëm mbi parimet e optimizimit dhe menaxhimit eficient të kostove”.
4.“Kurum International”
“Kurum International”, me aktivitet në prodhimin, tregtimin e çeliqeve të ndërtimit e profileve të tjera të hekurit dhe prodhim energjie, shënoi rënie të të ardhurave prej 18% në 2023, duke arritur në 37.7 miliardë lekë. Kjo nuk e ka penguar kompaninë të ruajë vendin e katërt, njësoj me vitin e kaluar.
Sipas raportit të aktivitetit, Shoqëria, gjatë vitit 2023 ka vijuar aktivitetin e saj në të gjithë sektorët e prodhimit, përfshirë prodhimin e prokateve të çelikut në fabrikën e çelikut, prodhimin e shufrave të çelikut në fabrikën e petëzimit, prodhimin e gëlqeres në fabrikën e gëlqeres, si dhe prodhimin e energjisë elektrike në 4 HEC-et në pronësi të saj.
Kompania ka prodhuar rreth 135,492 tonë prokate çeliku dhe rreth 281,373 tonë shufra çeliku.
Në aktivitetin tjetër, atë të energjisë, u prodhuan rreth 373 milionë KW, nga të cilat rreth 266 milionë KW u destinuan për shitje dhe pjesa tjetër për përdorim në fabrikën e përpunimit të çelikut të Elbasanit.
Sipas të dhënave në bilanc, gati 90% të ardhurave ishin nga aktiviteti kryesor (nga shitja e hekurit dhe nënprodukteve të tij) dhe pjesa tjetër, nga prodhimi i energjisë e aktivitetet e tjera. Një vit më parë, energjia përbënte 30% të të ardhurave për shkak të çmimeve të larta.
Erdal Demir, administrator i “Kurum International” pohon se ulja e të ardhurave lidhet kryesisht me rënien e çmimeve të hekurit të ndërtimit në bursat ndërkombëtare, e pritshme pas situatës së niveleve të larta në 2021-2022.
Edhe çmimet e energjisë shënuan rënie të pritshme pas krizës energjetike dhe niveleve të larta në 2022. “Shoqëria momentalisht ka mbyllur procesin e prodhimit në fabrikën e çelikut dhe të petëzimit, ndërkohë që është arritur një marrëveshje me punëtorët për këtë çështje, duke u siguruar atyre që të mos penalizohen për shkak të mbylljes së aktivitetit të prodhimit.
Ndërkohë, për të pasur mundësinë e rritjes së konkurrueshmërisë, shoqëria po vazhdon procesin e investimeve në të gjitha proceset prodhuese”.
5.“Gega Oil Group”
“Gega Oil Group” (ish-“Genklaudis SH.A.”) u rendit në vitin 2023, si operatori i dytë më i madh i naftës në vend, pas “Kastrati Group” për të pestin vit radhazi. Kompania ka deklaruar një qarkullim vjetor prej rreth 36.5 miliardë lekësh, me rënie prej 17.6% me bazë vjetore.
Sipas raportit të aktivitetit, “sasia totale e karburanteve e tregtuar për vitin 2023 është 347 milionë litra. Në raport me sasitë e shitura totale në vitin 2022, në vitin 2023 janë shitur gjithsej karburante në sasinë 22.5 milionë litra më shumë se viti 2022”.
Sipas raportit, shoqëria ka kryer investime në zonën energjetike Porto Romano, Durrës, dhe ka shtuar kapacitetin depozitues ekzistues për produktet që tregton.
6.“Big Market”
“Big Market”, zinxhiri më i madh i supermarketeve në vend, për herë të katërt është klasifikuar ndër 10 më të mëdhatë, sipas qarkullimit vjetor të konsoliduar për të gjithë rrjetin. Të ardhurat e kompanisë, sipas të dhënave zyrtare, ishin rreth 26.6 miliardë lekë, me rritje prej 8.7% në krahasim me vitin e kaluar.
Rrjeti i supermarketeve të “Big Market” ka njohur rritje të shpejtë vitet e fundit, duke arritur në 180 pika. Burime zyrtare thanë se theksi është vënë te përmirësimi i cilësisë dhe shërbimit në çdo pikë të rrjetit duke u fokusuar tek produktet e freskëta dhe përgjigja në kohë e të gjitha kërkesave të konsumatorëve për produkte apo mallra nga të gjitha kategoritë.
Ndikim ka dhënë dhe zgjerimi i sektorit jo ushqimor me një gamë të gjerë tekstile, kancelari, kopshtari etj. Kompania investon vazhdimisht në burimet njerëzore nëpërmjet skemave te vlerësimit, promovimit dhe trajnimit, krahas riorganizimit të brendshëm në nivele menaxhimi.
7.”Europetrol Durrës Albania”
“Europetrol Durrës Albania”, shoqëria që tregton karburante me shumicë ka rihyrë në listën e 10 më të mëdhave, pas daljes së sipërmarrjeve të tregtimit të energjisë.
Kompania raportoi të ardhura prej 22.1 miliardë lekësh, me rritje prej 11.6% në raport me vitin 2022. Sipas raportit të aktivitetit, dy elementet që ndikojnë në ecurinë e kompanisë janë çmimi i karburanteve në bursat ndërkombëtare, që është një faktor i jashtëm dhe kursi i këmbimit, pasi kompania është eksportuese.
“Ndër politikat mbrojtëse që zbaton kompania jonë, janë përcaktimi i çmimeve referuar Bursës Ndërkombëtare të çmimit të shitjes Brent, si dhe trendit të kontratave Forward dhe Future në bursën NYMEX”.
8.“Bankers Petroleum”
“Bankers Petroleum”, prodhuesi kryesor i naftës, që ka me koncesion fushën naftëmbajtëse më të madhe mbi tokë në Europë, Patos-Marinzën, raportoi të ardhura rreth 21.8 miliardë lekë, me rënie prej 18.7% me bazë vjetore, sipas burimeve të saj zyrtare (bilanci në QKB nuk është dorëzuar ende).
Huanqin Xiao, CEO i Bankers Petroleum Albania se kompania pati një performancë pozitive në 2023 dhe vazhdon të tregojë qëndrueshmëri në 2024. “Pavarësisht disa sfidave të tregut botëror, ne mbajtëm nivele të qëndrueshme prodhimi dhe likuiditet të qëndrueshëm të ardhurash.
Ne shënuam një prodhim total prej mbi 520,000 ton vitin e kaluar, duke gjeneruar një qarkullim të ardhurash prej 217 milionë dollarë”.
9.“Banka Kombëtare Tregtare”
“Banka Kombëtar Tregtare” (BKT) është një tjetër rihyrje në listën e 10 më të mëdhave. BKT mbetet banka më e madhe në vend sa u përket të ardhurave, më qarkullim prej 21.8 miliardë lekësh në 2023, me zgjerim prej 25%. Sipas të dhënave të tjera nga Shoqata e Bankave, BKT është më e madhja në vend për nga totali i aktiveve, e treta për nga huadhënia në ekonomi dhe e para për nga depozitat.
“Duke përfituar nga struktura e bilancit tonë, e cila është e mirëkapitalizuar dhe likuide, ne e mbyllëm vitin 2023 me fitim shumë të lartë: 26 për qind kthim mbi kapitalin në USD.
Të ardhurat gjithëpërfshirëse për vitin janë në një rekord prej 118 milionë USD, i cili do të na lejojë të vazhdojmë me pagesën e planifikuar të dividendit prej 50 milionë USD në vitin 2024, ashtu si edhe në vitin 2023.
Gjithashtu, kjo na lejon të forcojmë më tej bazën tonë të kapitalit, që na nevojitet si banka më e madhe sistemike në vend. Për këtë qëllim, ne emetuam obligacionin MREL prej 30 milionë Euro, i pari dhe më i madhi i këtij lloji në Shqipëri.
Edhe pse kjo na kushton uljen e levës dhe rritjen e kostos së kapitalit, ne jemi krenarë që jemi banka lider me rëndësi sistemike në vend”, ka pohuar drejtori i përgjithshëm i BKT-së, Seyhan Pencapligil, në raportin vjetor 2023.
10.“Kastrati”
“Kastrati” sh.p.k. operatori me pakicë i “Kastrati Group” ka hyrë në listë, në vendin e 10-të.
Të ardhurat e kompanisë ishin 20.1 miliardë lekë në 2023, me rënie vjetore prej 6.8% të ndikuar nga ulja e çmimeve dhe e kursit të këmbimit. Sipas të dhënave nga raporti i aktivitetit, numri i pikave të karburantit të shoqërisë në fund të 2023 ishte 87, me katër pika më shumë në raport me fundin e 2022.
Postimi ” 200 VIP-at e 2023; “Dorëzimi” i bizneseve ” eshte marre nga Revista Monitor.
