Ambasada e Rumanisë ne Shqipëri e drejtuar nga ShT.Z. Octavian Șerban, Ambasador i Rumanis në Shqipëri – organizoi ditën e sotme një tryezë te rrumbullakët për eHUB në Shqipëri. Tryeza e rrumbullakët e iniciuar nga z. Cristian Cutaș, Këshilltari për Cështjet Ekonomike dhe drejtuesi i zyrës për Promovimin Tregtar dhe Ekonomik në kuadër të Ambasadës së Rumanisë në Shqipëri, kishte të pranishëm Prof.Assoc.Dr. Cristian Lianu, President dhe koordinator i Wallachia eHUB dhe Dr. Irina Rădulescu, anëtare e bordit drejtues të Wallachia eHUB, zj. Shqipe Berisha, drejtuese e Qëndrës TUMO Tirana në kudaër të Piramidës së Tiranës, z. Jonian Omeri, anëtar i projektit Tricolor Albania dhe sipërmarrës, si dhe Dr. Ferjolt Ozuni, drejtues dhe koordinator i projektit Tricolor Albania.
Në këtë takim të zhvilluar në ambjentet e Ambasadës së Rumanisë në Shqipëri, fjalën hapëse e pati ShT. Z. Octavian Șerban, Ambasador i Rumanisë në Shqipëri, i cili theksoi rëndësinë që këto qëndra teknologjike, inovacioni dhe zhvillimi kanë në ditët e sotme, ku kanë rolin kryesor të zhvillimeve teknologjike për interesa private dhe publike në të gjitha sektoret. Z, Ambasador tregoi rëndësinë që këto qëndra kanë pasur dhe vazhdojnë të kenë në Rumani si dhe rezultatet që këto qëndra kanë pasur dhe pritet të kenë. Në fjalën e tij, z. Șerban theksoi dhe rolin proaktiv që institucionet shtetërore kanë dhe ndihmën financiare që duhet tu japin qëndrave si këto duke u bërë palë financuese sëbashku me institucionet e Bashkimit Europian – thekson artikulli i Tricolor.al
Më tej, në artikull theksohet se z. Cutaș, në rolin e iniciatorit të këtij evenimenti dhe takimi, theksoi rëndësinë që përfaqësitë e huaja të vendeve partnere të cilat kanë kaluar këto etapa në dy dekadat e fundit, kanë në mbështetjen e institucioneve Shqiptare në ecurinë e tyre në zhvillimin e qëndrave të tilla teknologjike të zhvillimit dhe inovacionit. Gjithashtu, z. Cutaș, në mbështetje të fjalëve të z. Ambasador, shprehu edhe një herë gadishmërinë e Ambasadës së Rumanisë në Shqipëri dhe të institucioneve Rumune për të mbështetur iniciativa të tilla dhe bashkëpunime mes kompanive dhe institucioneve të ndryshme Rumune dhe Shqiptare.
Në fjalën e saj zj. Berisha si drejtuese e TUMO Tirana falenderoi organizatorët për këtë tryezë të rrumbullakët dhe për mbështetjen e ofruar, si dhe theksoi nevojën që Shqipëria ka për partnerë dhe bashkëpunëtorë të cilët kanë kaluar në të “njëjtat rrugë” siç po kalon edhe Shqipëria, në zhvillimin teknologjik dhe inovacion, në kuadër të trendeve më të fundit dhe në kuadër edhe të aderimit të Shqipërisë në Bashkimin Europian. Zj. Berisha theksoi se është shumë e rëndësishme të kesh në krah partnerë të cilët dijnë dhe kuptojnë nevojat dhe vështirësitë që vendi ynë ka për zhvillimin e qëndrave të tilla për zhvillimin ekonomik por dhe për të ardhmen e të rinjve Shqiptarë, duke u dhënë një shpresë dhe një alternativë më shumë të rinjve Shqiptarë të rriten, të zhvillohen, të punojnë dhe të kontribuojnë në vendin e tyre.
Pas mbylljes së diskutimeve në këtë tryezë të realizuar në ambjentet e Ambasadës së Rumanisë në Tiranë, pjesëmarrësit vizituan nga afër edhe Piramidën e Tiranës ku gjendet e TUMO Tirana.
Kjo tryezë e rrumbullakët pason takimin që u zhvillua ditën e djeshme në Universitetin Mesdhetar të Shqipërise në të cilin synimi kryesor ishte promovimi i bashkëpunimit në arsim dhe teknologji mes Shqipërisë dhe Rumanisë, dhe do të pasohet nga takime të tjera në ditë në vazhdim.
