Vende të reja të rëndësishme përfshijnë Afrikën e Jugut, Turqinë, Poloninë dhe Emiratet e Bashkuara Arabe. Aktualisht, shërbimi streaming është i disponueshëm në 64 vende, duke përfshirë Shtetet e Bashkuara të Amerikës, Kanadanë dhe Mbretërinë e Bashkuar. Disney + nuk i ka saktësuar datat se kur do të lançohet shërbimi i tij në këto vende të reja dhe nuk ka dhënë informacione në lidhje me çmimet, por ka të ngjarë që këtë ta bëjë në muajt e ardhshëm.
Lista e plotë e vendeve të reja përfshin Shqipërinë, Algjerinë, Bahrejnin, Bosnjën dhe Hercegovinën, Bullgarinë, Kroacinë, Republikën Çeke, Egjiptin, Estoninë, Greqinë, Hungarinë, Irakun, Izraelin, Jordaninë, Kosovën, Kuvajtin, Letoninë, Libanin, Libinë, Lihtenshtajnin, Lituaninë, Maltën, Malin e Zi, Marokun, Maqedoninë e Veriut, Omanin, Palestinën, Poloninë, Katarin, Rumaninë, San Marinon, Arabinë Saudite, Serbinë, Sllovakinë, Slloveninë, Afrikën e Jugut, Tunizinë, Turqinë, Emiratet e Bashkuara Arabe, Qytetin e Vatikanit dhe Jemenin.
Për sa u përket territoreve të reja, lista përfshin Ishujt Faroe, Polinezinë Franceze, Territoret Jugore Franceze, St. Pierre and Miquelon Overseas Collective, Ishujt Åland, Sint Maarten, Svalbard & Jan Mayen, Territorin Britanik në Oqeanin Indian, Gjibraltarin, Ishujt Pitcairn dhe Shën Helena.
Lajmi për zgjerimin vjen pasi Disney zbuloi së fundi se planifikon të dyfishojë numrin e vendeve ku Disney+ është i disponueshëm në më shumë se 160 brenda vitit fiskal 2023. Kompania planifikon të zgjerojë aktivitetin e streaming direkt te konsumatori (direct-to-consumer streaming) në më shumë tregje globale dhe po krijon një grup të ri ndërkombëtar me përmbajtje dhe aktivitete për të arritur këtë objektiv.
Grupi do të udhëhiqet nga Rebecca Campbell, veterane e Disney për thuajse 25 vjet, e cila do të fokusohet në prodhimin e përmbajtjeve lokale dhe rajonale për shërbimet streaming të Disney, ndërkohë që do të mbikëqyrë edhe grupet ndërkombëtare të Disney.
Deri në fund të vitit fiskal 2021, Disney thotë se kishte në total 179 milionë abonime nëpërmjet Disney+, ESPN+ dhe Hulu. Shoqëria thekson se Disney+ arriti 118 milionë abonime në nivel global në tremujorin e katërt 2021.
Disney+ u lançua në fund të vitit 2019 dhe dy vitet e fundit i ka kaluar duke konkurruar me Netflix, Amazon Prime Video dhe shërbime të tjera streaming,
Në lidhje me kontekstin, Netflix dhe Amazon Prime Video janë të disponueshme në nivel global, me disa përjashtime. Netflix nuk është i disponueshëm në Kinë, Krime, Korenë e Veriut ose Siri, ndërsa Amazon Prime Video nuk është i disponueshëm në Kinën Kontinentale, Iran, Korenë e Veriut dhe Siri.
