Në 24 orët që pasuan njoftimin e 20 shtatorit, fluturimet nga Londra në New York u kontrolluan 1.4 milionë herë, sipas kompanisë globale të teknologjisë së udhëtimit Travelport, duke e bërë atë kërkimin më të madh të ditës të fluturimeve drejt SHBA. Pra, ky kërkim për bileta avioni nga Londra drejt New York tejkaloi çdo kërkim tjetër për bileta të asaj dite – edhe se nuk arriti të ishte itinerari me më shumë prenotime atë ditë.
Europianët rezervuan më shumë bileta avioni në një itinerar tjetër – nga Londra në Orlando – sipas Travelport, i cili analizon rezervimet e bëra përmes agjentëve të udhëtimit dhe faqeve të internetit si Priceline dhe Booking.com.
“Këto kërkesa në rritje tregojnë kthimin e kërkesës për udhëtime turistike”, tha Katie Cline, drejtoreshë në Travelport, për CNBC.
Rikthehen edhe udhëtimet e biznesit
Njoftimi i 20 Shtatorit i cili tregonte se bllokimet dhe ndalimet për të udhëtimuar të cilat hynë në fuqi gjatë periudhës së pandemisë do të zëvendësoheshin nga protokollet e vaksinimit dhe testimit të Covid për udhëtarët ndërkombëtarë, specifikonte një periudhë rifillimi – “në fillim të Nëntorit” – por jo një datë fikse. Kjo ishte e mjaftueshme për t’i drejtuar turistët dhe të apasionuarit pas udhëtimeve direkt tek kompjuterët (tabletat apo dhe telefonat) e tyre – shumë prej të cilëve rezervuan udhëtime për të ardhmen e afërt duke mos pasur një datë rihapjeje fikse. Shumica e rezervimeve për në Orlando, Florida – shtëpia e Walt Disney World dhe Universal Orlando Resort – ishin për udhëtime për në verën e vitit 2022, tha Cline.
Më 15 Tetor, administrata e Biden njoftoi se rregullat e reja dhe rihapja e vendit për turistët do të nisnin më 8 Nëntor. Kjo deklaratë shkaktoi një lumë rezervimesh për udhëtarët e biznesit për udhëtime përpara fundit të vitit. “Pas njoftimit të dytë, udhëtimi për qëllime biznesi nga Londra në New York është pothuajse dyfishuar”, tha Cline. Të dhënat e prenotimeve të hoteleve nga kompania e marketingut të udhëtimeve Adara mbështesin këtë prirje. Udhëtarët europianë për qëllime turistike dhe udhëtarët e biznesit rezervuan hotele në SHBA me tarifa dhe ritme të ngjashme deri në mes të tetorit. Më pas, rezervimet e biznesit u rritën me shpejtësi të madhe.
Ku po shkojnë Europianët
“Popullariteti i itinerarit sewhr Orlando shpejt u eklipsua”, tha Cline, “nga një itinerar fluturimi transatlantik të cilin e prisnim: nga Londra në New York”. Sipas Adara, qyteti i New York-ut është gjithashtu destinacioni kryesor për prenotimet e hoteleve. Udhëtarët europianë gjithashtu favorizuan qytetet dhe zonat me diell dhe të ngrohta, shtoi më tej Adara. Europianët, gjithsesi, ende nuk po shfaqin interes të njëjtë për shumicën e qyteteve në SHBA. Megjithatë ka zona dhe qytete ku rezervimet po afrohen shifrave të para pandemisë apo edhe i tejkalojnë ato, si psh rezervimet e hoteleve në Phoenix kanë shkuar në 84% për sa i përket udhëtarëve të biznesit, ndërsa Honolulu është rritur duke shkuar në 139% për sa i përket udhëtarëve për qëllime turistike, sipas Adara. Miami gjithashtu është rikthyer në hapin e tij para pandemisë.
Sa i përket interesit të papritur për Phoenix, CCO e Adara, Carolyn Corda tha se ajo beson se kjo mund të jetë për shkak të rritjes së konferencave të biznesit të vogël në zonën respektive.
“Phoenix u bën thirrje bizneseve pasi ka shërbim të mirë ajror, golf të shkëlqyer, diell dhe aktivitete në natyrë”, tha ajo. “Është gjithashtu pak më e lehtë për të mbledhur pjesëmarrësit në resorte se sa në një destinacioni si Las Vegas.”
Hotelet nuk janë të vetmet vende që po shohin interes të shtuar nga udhëtarët europianë. Pas njoftimit të 20 Shtatorit, kërkimet për shtëpi me qira në SHBA nga europianët u rritën me 91% në faqen e internetit të shtëpive me qira për pushime HomeToGo, krahasuar me një javë përpara se të bëhej njoftimi i rihapjes. Sërish qyteti i New York-ut qëndron në krye të qyteteve më të kërkuara. Ishte destinacioni më i kërkuar në SHBA për marrjen me qira të shtëpive nga udhëtarët europianë nga Gushti deri në Tetor, sipas HomeToGo . Pesë shtete dominuan pjesën e mbetur të listës së top 10:
- Kaliforni : Orange County (Vendi 2), LA (Vendi 5), San Diego (Vendi 7), San Bernardino County (Vendi 10)
- Florida : Miami-Dade County (Vendi 4), Broward Country (Vendi 6)
- Hawaii : Honolulu (Vendi 3)
- Kolorado : Summit County (Vendi 8)
- Pensilvani : Malet Pocono (Vendi 9)
“Nevoja për të udhëtuar tani”
Që nga Shtatori, “tregjet e origjinës” kryesore për udhëtime dhe turistë nga Europa në SHBA janë Mbretëria e Bashkuar, Holanda, Franca dhe Gjermania, sipas Adara. Por britanikët janë duke udhëhequr listën, sipas Travelport. Të dhënat e tij tregojnë se në 24 orët pas njoftimit të udhëtimit të 20 Shtatorit, fluturimet për në SHBA nga Britania e Madhe u kontrolluan më shumë se fluturimet me destinacion SHBA nga të gjitha vendet e tjera Europiane së bashku. Pas njoftimit të 15 Tetorit, fluturimet nga Britania e Madhe në SHBA për fundjavën e Falenderimeve (Thanksgiving) u rritën me 2200%. Cline tha se beson se kjo është për shkak të ribashkimit të familjeve për pushime, si dhe britanikëve që shijojnë blerjet e së Premtes së Zezë (Black Friday) në Shtetet e Bashkuara. “Përveç kësaj, kjo nënvizon tendencën më të madhe që po shohim për ‘nevojen për të udhëtuar tani’,” tha ajo. “Nëntori ishte muaji më popullor për udhëtimet në SHBA nga Europa, dhe 8 Nëntori – dita e rihapjes – ishte data më e kërkuar dhe popullore e nisjes.”
Rimëkëmbja është duke u kryer
“Rritja në udhëtimet ndërkombëtare është një lajm pozitiv për industrinë e udhëtimeve dhe turizmit”, tha Cline, e cili shtoi më tej se “është hera e parë që ne kemi pasur një rritje kaq të rëndësishme në udhëtimet e korporatave transatlantike që nga fillimi i pandemisë.” Megjithatë, industria është ende larg një rikuperimi të plotë. Kërkesa agregate për rezervime hotelesh nga udhëtarët nga Europa, Lindja e Mesme dhe Afrika në SHBA është ulur 43% nga viti 2019, sipas Adara. Udhëtarët britanikë të biznesit kane bërë gjysmën e numrit të rezervimeve të hoteleve në SHBA për udhëtimet e fundvitit 2021, krahasuar me vitin 2019, sipas Adara.
Rezervimet e hoteleve nga udhëtarët e biznesit nga Gjermania (65% më pak) dhe Zvicra (56% më pak) janë gjithashtu dukshëm në rënie, ndërsa rezervimet nga Izraelitët (21% më pak) janë më afër niveleve para pandemisë. Udhëtarët Holandezë të biznesit, megjithatë, nuk duken shumë të prekur dhe frikësuar nga pandemia pasi të dhënat e Adara tregojnë se hotelet amerikane të rezervuara nga Holanda janë rritur me 44% këtë vit në krahasim me 2019. Megjithatë, si shpejtësia ashtu edhe kohëzgjatja e rritjes së rezervimeve së bashku me interesin për zonat e dendura urbane janë të gjitha shenja optimiste të një rikuperimi, sipas një raporti të lëshuar nga Adara në tetor.
“Ne presim që këto tendenca të vazhdojnë rritjen me vrull,” tha Adara.
