Profesionistët shpesh krenohen që punojnë me orë të gjata.
Të tjerë punojnë jashtë orarit, sepse eprorët e tyre shpërblejnë vetëm ata që janë gjithmonë në punë.
Të dhënat nga aplikacioni për gjurmimin e kohës Clockify, sugjerojnë se punonjësi mesatar me kohë të plotë në SHBA punon 260 orë në vit më shumë se punonjësit në vendet e zhvilluara si Australia, Kanadaja, Franca dhe Holanda.
Kjo është më shumë se gjashtë javë pune me kohë të plotë në vit ose 1.1 orë në ditë.
Në shumë organizata, ekziston një rregull i heshtur se më shumë orë barazohen me performancë të lartë.
Megjithatë, studimet tregojnë një të vërtetë tjetër.
Ekonomistët kanë paralajmëruar prej kohësh se javët e gjata të punës rrezikojnë performancën e punëtorëve të fabrikës.
Në një seri studimesh, John Pencavel, Profesor Emeritus në Stanford, zbuloi se çdo orë shtesë e punuar mbi 53 orë në javë uli me shpejtësi prodhimin e javës së ardhshme.
Punëtorët me 70 orë punë në javë kishin 19 % më pak prodhim javën e ardhshme, sesa ata që punonin 53 orë.
Pencavel spekuloi se punëtorëve u duhet kohë pushimi për të rifituar energjinë e shpenzuar.
Studime të tjera e konfirmojnë këtë, duke i caktuar gjumit një rol kryesor.
Një studim midis 429 punonjësve, i botuar në “Occupational Medicine”, zbuloi se ata që punonin më shumë se 48 orë në javë raportuan cilësi më të ulët të gjumit, sesa punonjësit që punonin më pak orë.
Bazuar në të dhënat nga më shumë se 10,000 amerikanë, profesori Christopher Barnes dhe kolegët e tij zbuluan se punonjësit humbin një orë gjumë për çdo tre orë punë përtej ditës 8-orëshe të punës.
Më 7 janar, Fondacioni Kombëtar i Gjumit publikoi të dhëna, që ilustrojnë se sa vendimtar është gjumi për performancën e punës.
Nga 1,372 të rriturit amerikanë të anketuar, një shumicë e madhe raportojnë ndikime negative në produktivitetin e punës, kur nuk flenë mjaftueshëm (60%) ose kur nuk bëjnë gjumë cilësor (70%).
Ditët e gjata të punës mund të jenë të rrezikshme
Performanca e dëmtuar për shkak të turneve të gjata mund të ketë pasoja katastrofike.
Një studim mbi cilësinë dhe sigurinë e pacientit për Harvard Work Hours and Safety Group, zbulon se infermierët që punojnë më shumë se 12,5 orë rresht, kanë deri në tre herë më shumë gjasa të bëjnë një gabim në kujdesin ndaj pacientit.
Akoma më tronditëse, mjekët në trajnim me turne të përsëritura 24 orëshe bëjnë 300 % më shumë gabime mjekësore, që çojnë në vdekjen e një pacienti.
Si të keni kontroll mbi orët e punës
Më poshtë janë disa ide për organizatat dhe punonjësit, që të ‘fillojnë luftën’ për orë më të menaxhueshme të punës.
- Nisni nga fillimi
Ndryshimi i kulturës së punës nuk ndodh brenda natës. Megjithatë, ndihmon nëse drejtuesit marrin një qëndrim të qartë.
Shkruani një udhëzues për orët e punës, që nënvizon vlerësimin e cilësisë së punës në vend të orëve të gjata.
Sigurohuni që punonjësit ta lexojnë atë dhe, më e rëndësishmja, t’ju besojnë.
- Drejtuesit japin shembullin
Punonjësit ka më shumë të ngjarë t’ju besojnë, nëse menaxherët ndjekin udhëzimet e orarit të punës.
Nëse drejtuesit zakonisht punojnë mbi 60 orë në javë, ata komunikojnë se kjo është normë.
Sjellja është një shenjë shumë më e fortë se çdo deklaratë e shkruar.
E njëjta gjë vlen edhe për shpërblimin e punonjësve. Caktoni bonuse dhe promovime bazuar në rezultate, jo në të dhëna.
- Vendosni pritshmëritë e duhura
Për të miratuar udhëzimin e ri, shpjegoni orët tuaja të punës për ekipin tuaj.
Sqaroni se dërgimi i emaileve të dielën mbrëma shkon për ju, por nuk do të thotë që prisni që të tjerët të jenë online atëherë.
- Gjeni një aleat
Në shumë kultura të punës me presion të lartë, punonjësit supozojnë se kolegët janë dakord me ritmin dhe ngarkesën e punës.
Flisni me të tjerët për të parë se si po përballen. Është më e lehtë të ngreni shqetësime me mbikëqyrësit tuaj kur ju bashkohen edhe kolegët e tjerë.
/ Forbes, Shqip.al
Postimi ” Pse puna me orë të gjata dëmton performancën ” eshte marre nga Revista Monitor.
