Bitcoin arriti një rekord të ri, dollari amerikan u rrit në nivelin më të lartë në katër muaj dhe aksionet e kompanisë Tesla kërcyen, teksa investitorët kishin pritshmëri të larta nga fitorja e Donald Trump në zgjedhjet presidenciale në SHBA.
Dollari u rrit me 0.6 për qind kundrejt një shporte monedhash të hënën, duke kaluar nivelin që arriti një ditë pas zgjedhjeve javën e kaluar dhe duke e çuar atë në kuotën më të lartë që nga korriku. Euro ra me 0.7 për qind në 1.064 dollarë, niveli i saj më i ulët që nga prilli.
Bitcoin, i cili ka arritur një seri nivelesh rekord pas zgjedhjeve, u rrit me 7 për qind në 81,923 dollarë, teksa republikanët dukeshin gjithnjë e më të prirur për të marrë kontrollin e Dhomës së Përfaqësuesve, pasi kishin fituar tashmë një shumicë në Senat.
Administrata Trump pritet gjerësisht të jetë mbështetëse për industrinë e kriptove dhe, me kontrollin e të dy dhomave të Kongresit, do të kishte fuqi më të madhe për të miratuar legjislacion të favorshëm.
Në tregun e aksioneve spikat Tesla, prodhuesi i automjeteve elektrike i drejtuar nga mbështetësi i Trump, Elon Musk, që u rritën me 6 për qind në tregtimet e hershme. Kompania ka kaluar 1 trilion dollarë në kapitalizimin e që nga dita e zgjedhjeve, duke ndihmuar në rritjen e pasurisë personale neto të Musk me rreth 32 miliardë dollarë.
“Ajo që ne po shohim është se njerëzit po nxitojnë të investojnë sa më parë në tregtimet që lidhen me politikat e Trump,” tha Emmanuel Cau, kreu i strategjisë evropiane të kapitalit në Barclays.
Performanca e kriptove dhe të ashtuquajturave “tregtime të lidhura me politikat e Trump” ishte një tregues i pritshmërive se se ish-presidenti do të kishte një qasje të lehtë ndaj rregulloreve gjatë mandatit të tij të dytë, tha Mabrouk Chetouane, kreu i strategjisë së tregut global në Natixis Investment Managers.
“Investitorët janë të gatshëm të ndërmarrin rreziqe, edhe pse priten më shumë politika mbrojtëse,” tha ai, duke iu referuar planeve të Trump për të rritur ndjeshëm tarifat mbi importet në SHBA.
Fitorja vendimtare e kandidatit republikan i shtyu tregtarët të vlerësojnë premtimet e presidentit të zgjedhur për uljen e taksave dhe tarifave, duke nxitur dollarin dhe duke shkaktuar një shitje të obligacioneve të qeverisë amerikane.
Postimi ” Rriten ndjeshëm dollari, bitcoin dhe aksionet e Tesla pas fitores së Trump ” eshte marre nga Revista Monitor.
