Ledina Elezi/
Në sistemin financiar të vendit, përveç sektorit bankar, edhe ai jobankar ka pasur rritje të aktivitetit gjatë gjysmës së parë të vitit. Konkretisht, totali i aktiveve të institucioneve financiare jobanka u shtua me rreth 4 miliardë lekë, duke u ngjitur në nivelin 68 miliardë lekë.
Sektori i aktiviteteve të tjera të shërbimit dhe ai i tregtisë me shumicë dhe pakicë janë sektorët më të financuar prej tyre me nga 22% dhe 18% të totalit të stokut për bizneset, ndjekur nga ndërtimi me 10%. Kredia dhënë individëve zë më shumë se gjysmën e totalit të huasë dhe pjesa tjetër u takon bizneseve.
Nga ana tjetër, institucionet e pagesave dhe parasë elektronike ruajtën nivelin e aktiveve të fundit të një viti më parë prej 36 miliardë lekësh.
Kredia dhe letrat me vlerë të borxhit vijojnë të zënë peshën kryesore në aktivet e subjekteve financiare të ndryshme nga bankat. Letrat me vlerë të borxhit zënë 26% të aktiveve financiare të sektorit jobankar, ndërsa huatë dhe monedhat e depozitat zënë respektivisht 28% dhe 21%, megjithatë këto raporte janë të ndryshme për subjektet e këtij sektori.
Peshën kryesore në veprimtarinë e sektorit jobankar e zë aktiviteti i institucioneve financiare jobanka, ndjekur nga fondet e investimit dhe shoqëritë e sigurimit. Aktualisht, në tregun financiar operojnë 40 institucione financiare jobanka, nga të cilat 25 subjekte janë institucione të kredisë, mikrokredisë, faktoringut, qirasë financiare, blerjes së kredive me probleme, vetëm 5 subjekte janë institucione pagesash dhe 10 janë institucione të parasë elektronike.
Rreth 37% e aktivitetit të institucioneve financiare jobanka është kreditues, ndjekur nga shërbimet e pagesave dhe transfertave me 31%, si dhe paraja elektronike që përbën 20% të aktivitetit.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
