Biznesi do të mbrohet nga çmimet e larta të energjisë edhe përgjatë vitit të ardhshëm, duke nisur nga mbi 7,600 bizneset në tensionin e mesëm që prej një viti kanë një çmim të subvencionuar nga shteti.
“Për sa kohë do të jetë në forcë gjendja e emergjencës energjetike, nuk planifikojmë të ekspozojmë në treg kompanitë e lidhura me tensionin e mesëm”, deklaroi Balluku.
Bizneset vlerësuan nismën, por kërkuan zgjatjen e mëtejshme të kësaj mbrojtjeje, edhe kur të nisë operimin bursa e energjisë.
“Po mos të ishim mbështetur, mund të ishim ekspozuar për falimente, do të donim që dhe vitin e ardhshëm mos të na nxirrni në treg”, pohoi Alban Zusi i Qendrës së Eksporteve Shqiptare.
Bizneset kërkuan edhe lehtësimin e procedurave për instalimin e paneleve diellore, proces që ka nisur me pushtetin vendor sipas ministres. Ndërsa për prodhuesit në tensionin e lartë, Balluku njoftoi lehtësimin e çmimeve përmes futjes së KESH si operator në tregun e lirë.
Nga viti i ardhshëm kompanitë e energjisë pritet t’i rikthehen investimeve, veçanërisht në drejtim të humbjeve në rrjet. Ndërsa Balluku prezantoi edhe çmimin e ri të blerjes së energjisë nga prodhuesit e hidrocentraleve të vegjël.
“Keni kërkuar një rishikim të çmimit, dhe duke filluar nga 2023 do të jetë 10 lekë për kilovat/orë”, shtoi ministrja.
Përfaqësues të prodhuesve të energjisë kërkuan zgjatjen e afateve të koncesioneve deri në 99 vjet. Sipas Ballukut, qeveria nuk është e gatshme të ndërhyjë në këtë ligj, por do të shikohen mundësi për privatizimin apo për t’i ridhënë ato me koncesion në përfundim të afatit, në mënyrë që të mos dekurajohen investimet.
Burimi: A2 CNN
