Tregu i shitjeve me pakicë është një ndër më të mëdhenjtë në vend.
Të dhënat zyrtare të INSTAT tregojnë se të ardhurat nga shitjet neto në tregtinë me pakicë ishin 461 miliardë lekë në vitin 2023, apo 4.6 miliardë euro (e dhëna e fundit e disponueshme).
Një nga sektorët që duket se po nxit zgjerimin e industrisë retail është turizmi, ku operatorët pranojnë se shitjet sezonale, sidomos gjatë periudhës kryesore turistike, që konsiderohet ajo maj-shtator, kanë nxitur zgjerimin e ofertës, kapaciteteve logjistike dhe pikave në zonat me frekuentimin më të lartë me vizitorë.
Ky treg po riformatohet vitet e fundit, teksa zinxhirët e supermarketeve po zgjerohen, duke marrë nga tregu i dyqaneve të vogla, që po mbyllen për shkak të rritjes së konkurrencës dhe konsumit të dobët.
Sipas të dhënave të INSTAT, në vitin 2023 kishte 30 mijë ndërmarrje në tregtinë me pakicë, nga 35 mijë në vitin 2015, ndonëse qarkullimi vjetor i këtij sektori ishte më se dy herë më i lartë në raport me atë periudhë.
Burimi: INSTAT
Pavarësisht rritjes së vazhdueshme të zinxhirëve të organizuar, tregu vijon ende të jetë i fragmentuar.
Sipas të dhënave nga xhiro e 7 supermarketeve më të mëdha në vend, ato zinin rreth 10% të tregtisë me pakicë, sa u takon të ardhurave nga shitjet neto. Gjithsesi, vitet e fundit, rrjetet e organizuara po forcohen dhe konkurrenca është shtuar.
Dy vitet e fundit, numri i operatorëve që kanë hyrë në renditjen e “Monitor 200” është shtuar, teksa ky segment po zgjerohet me shpejtësi. Megjithatë, tregu ndien pasojat e emigracionit, sidomos të të rinjve.
Në periudhën e verës ndikon pozitivisht shtimi i turistëve.
Të dhënat e INSTAT për indeksin e tregtisë me pakicë të ushqimeve, pije e duhan në njësi të specializuara, tregojnë se rritja e tregut në tërësi është e qëndrueshme.
Burimi: INSTAT
– “Big Market” është rrjeti më i madh i supermarketeve në vend, por nuk figuron në listën e më të mëdhave, për shkak të strukturës së operimit të tij me subjekte të veçanta për çdo pikë shitjeje, që çon në raportim me dyqane të ndara. Operatori kishte 27.7 miliardë lekë të ardhura në vitin 2024, sipas të dhënave zyrtare nga kompania, me rritje 4%, me bazë vjetore.
– Rrjeti i supermarketeve “SPAR Albania” (pjesë e grupit BALFIN), raportoi të ardhura prej 12.4 miliardë lekësh, me zgjerim 15.3% me bazë vjetore vetëm nga rrjeti i dyqaneve që menaxhon vetë.
Sipas raportit vjetor, rritja është nxitur nga dy faktorë kryesorë: rritja organike e performancës në marketet ekzistuese dhe hapja e njësive të reja, të cilat kanë sjellë ndikim të drejtpërdrejtë në përshpejtimin e volumit të shitjeve.
Në fund të vitit 2024, rrjeti përfshinte 92 pika shitjeje në të gjithë vendin. Prej këtyre, 43 markete janë nën menaxhimin e drejtpërdrejtë të “SPAR Albania”, përfshirë hipermarketet në qendrat tregtare TEG dhe QTU, ndërsa 49 operojnë nëpërmjet modelit të operimit franchise me partnerë lokalë në Shqipëri.
Duke përfshirë dhe të ardhurat nga “SPAR Franchise”, qarkullimi total vjetor i SPAR arriti në 20.2 miliardë lekë, me rritje 7.4% me bazë vjetore, sipas të dhënave zyrtare nga kompania.
“Gjatë vitit 2025, ‘SPAR Albania’ do të përqendrohet në zgjerimin e mëtejshëm të rrjetit të supermarketeve, me synimin për të shtrirë praninë e saj në zona të reja të territorit shqiptar”, thuhet në raportin e aktivitetit.
Në fund të muajit mars 2025, kompania nga Kosova, “Viva Fresh Store”, njoftoi se ka arritur një marrëveshje për blerjen e “SPAR Albania”.
Kalimi i SPAR Albania nën pronësinë e Viva Fresh Group shënon një pikë kthese për tregun modern në Shqipëri, sipas burimeve zyrtare. Rrjeti pritet të hyjë në një fazë të re zhvillimi, me plane për dyfishim të numrit të pikave të shitjes në një periudhë pesëvjeçare.
Strategjia do të mbështetet në një zgjerim agresiv në të gjithë territorin shqiptar, ku vetëm gjatë vitit të ardhshëm, krahas hapjes së 10 supermarketeve dhe 4 hipermarketeve të reja, do të prezantohen edhe formate inovative si Compact Hyper, të cilat kombinojnë komoditetin e supermarketeve me gamën e gjerë të hipermarketeve.
– “Conad Albania” raportoi të ardhura prej 4.4 miliardë lekësh në 2024-n, me një rritje prej 7.3% me bazë vjetore, duke rikuperuar rënien e vitit të mëparshëm.
Në vitin 2023, të ardhurat e shoqërisë u reduktuan me 5.3%, e ndikuar me mbylljen e 9 supermarketeve që nuk përshtateshin 100% me standardin e saj.
Sipas raportit të aktivitetit, “2024-a ka qenë një vit konsolidimi për kompaninë, e cila operon në sektorin e tregtisë ushqimore me shumicë nën markën ndërkombëtare ‘Conad’.
Kompania ka treguar rezistencë të lartë ndaj sfidave të tregut duke shënuar një rritje të qëndrueshme në të gjithë treguesit kryesorë”.
Ndër faktorët kryesorë që kompania vlerëson të kenë ndikuar pozitivisht në ecurinë e aktivitetit në vitin 2024 janë rritja e konsumit të produkteve cilësore; stabilizimi i kursit të këmbimit Lek/Euro; rritja e PBB-së dhe fuqisë blerëse; ndryshimi i preferencave drejt produkteve të shëndetshme.
– “D & D Distribution” (ish-Eco Market Food), me aktivitet në fushën e prodhimit, magazinimit dhe tregtimit të prodhimeve e ushqimeve blegtorale e bujqësore, raportoi të ardhura rreth 2.6 miliardë lekë në vitin 2024, me rënie prej 24% me bazë vjetore.
– “Tirana Cash & Carry” (me të njëjtin aksioner si “Big Market”) raportoi rreth 3 miliardë lekë të ardhura, me rënie prej 1%.
“Diambe” është për të tretin vit radhazi në listën e “Monitor 200”, duke shënuar sërish rritje të fortë me 28%, në 4.9 miliardë lekë. Ky është viti i tretë radhazi me zgjerim mbi dyshifror. Zinxhiri i marketeve zbaton konceptin e “discount” në vend dhe ka filluar aktivitetin në vitin 2014.
“Xhangolli Group”, shoqëria që menaxhon rrjetin e supermarketeve “Xhangolli”, është në listë për të dytin vit radhazi.
Në 2024-n, qarkullimi vjetor i shoqërisë ishte 3.4 miliardë lekë. Në shtator 2023, aktiviteti ekonomik ka kaluar nga personi fizik “Hysen Xhangolli” te shoqëria “Xhangolli Group” sh.p.k.
Në vitin 2023, të ardhurat e personit fizik ishin 3.6 miliardë lekë.
“Extramarket” është për të dytin vit radhazi në renditjen e 200 më të mëdhave. Të ardhurat u rritën me 12.6%, në 2.9 miliardë lekë.
“Shoqëria me investimet e kryera më parë, konkretisht me selinë e re dhe me magazinë të re, si dhe me rikonstruksionet e disa pikave të shitjes, ka bërë të mundur që të ketë një organizim më të mirë në shpërndarje, transport dhe kontroll të punës në të gjitha hallkat e saj.
Ky investim ka mundësuar rritjen e kapaciteteve tregtuese të kompanisë”, thuhet në raportin vjetor.
“Rossmann-Lala”, rrjeti gjermano-shqiptar i marketeve, po rezulton një nga bizneset më të qëndrueshme, me shtim dyshifror vit pas viti. Në vitin 2024, qarkullimi i saj vjetor arriti në 6.9 miliardë lekë, me zgjerim prej 10.3%.
Kompania tregton produkte kozmetike, parfume, shëndeti, si dhe produkte të tjera dytësore të kësaj kategorie.
Aktiviteti i saj shtrihet në të gjithë Shqipërinë, duke operuar në një rrjet prej 23 dyqanesh, nga të cilat 16 me vendndodhje në Tiranë, një në Vlorë, një në Durrës, një në Shkodër, një në Fier, një në Sarandë, një në Korçë dhe një në Lezhë.
Gjatë vitit 2024 janë hapur dy dyqane të rinj, një në Tiranë dhe një në Lezhë. Shoqëria ka aktivitet dhe në Kosovë.
“Megatek”, hipermarketi më i madh “Bëje vetë”/DIY në Shqipëri, ka raportuar të ardhura prej 3.1 miliardë lekësh në vitin 2024, me tkurrje 4% me bazë vjetore.
Sipas raportit vjetor, “‘Megatek’ ka bërë përmirësime thelbësore në strukturën e saj të shitjes, e cila ka çuar në rritje dhe qëndrueshmëri të fitimit.
Për vitin 2024, për zgjerimin e aktivitetit është investuar në vlerë totale 62.6 milionë lekë në ndërtesë, mjete, makineri dhe pajisje informatike.
Tregu i njësive të organizuara të shitjes me pakicë pritet të zhvillohet dhe më tej, teksa po bën gati infrastrukturën për të hyrë zinxhiri me origjinë gjermane i dyqaneve ushqimore me zbritje “Lidl”, që aktualisht vepron në 31 shtete dhe ka mbi 12.5 mijë njësi shitjeje.
“Lidl” po hyn në tregun shqiptar me një investim strategjik që parashikon ndërtimin e një qendre logjistike prej rreth 105 milionë eurosh në Porto Romano, pranë Durrësit, e cila do të shërbejë si bazë për furnizimin e rrjetit të ardhshëm të supermarketeve në vend.
Kompania gjermane, e pranishme me njësi lokale në Shqipëri që nga viti 2022, ka fituar statusin e “Investitorit Strategjik”, që i siguron lehtësi administrative dhe akses të përparuar në tokë publike.
Projekti pritet të krijojë rreth 2,500 vende pune dhe të përmirësojë zinxhirin e furnizimit, duke integruar edhe prodhuesit vendas në një rrjet modern shpërndarjeje, ndërsa synimi afatgjatë është shtrirja kombëtare me supermarkete të reja.
ELEKTROSHTËPIAKET, RRITJE E NGADALTË
“Neptun” mbetet tregtuesi më i madh i produkteve elektroshtëpiake dhe elektronike në vend. Në vitin 2024, të ardhurat e “Neptun” ishin 8.8 miliardë lekë, me zgjerim vjetor prej 4.5%.
Në raportin e aktivitetit, kompania shpjegon se “Neptun” është aktualisht rrjeti më i madh në sektorin e elektroshtëpiakeve i pranishëm me 30 dyqane dhe duke planifikuar zgjerimin në 31 dyqane deri në fund të vitit 2025 dhe 19 dyqane “Nova”, duke mbuluar gjithë vendin.
“Neptun” është kompania më e madhe edhe për sa i përket shitjes me pakicë online të pajisjeve elektronike dhe elektroshtëpiakeve.
“Sidoqoftë, konkurrenca ka filluar të bëhet më e vështirë në treg. ‘Globe’ dhe ‘AZA’ SH.P.K. vazhdojnë të jenë konkurrentët më seriozë të kompanisë sonë”, thuhet në raportin vjetor.
Për të ardhmen “Neptun” po përgatitet të prezantojnë për herë të parë në tregun shqiptar përqasjen Omni-Channel (shumë kanale) duke i mundësuar konsumatorit të blejë online nga ekrani i kompjuterit ose telefonit celular, duke telefonuar, ose edhe në një dyqan fizik.
Kompania pohon se po lëviz drejt online-it, ku si konkurrent në këtë fushë (elektronika) është “Supermart”, ndërsa në disa kategori të tjera si klima, konkurrentët kryesorë janë “Klimateknika” dhe “Best Tech”.
Alexandros Kosenas, CEO Neptun, pohon se “rritjet globale të kostove të lëndëve të para dhe transportit kanë pasur ndikim të drejtpërdrejtë në çmime.
Edhe pse markat dhe shitësit me pakicë përpiqen të përthithin një pjesë të këtij ndikimi, ndërprerjet në rrjetet e furnizimit dhe presioni i diktuar nga inflacioni kanë ndikuar si në disponueshmërinë, ashtu edhe në sjelljen e konsumatorit.
Gjithashtu, kemi vënë re interes gjithnjë e më të shtuar të konsumatorëve për produkte me efikasitet energjetik si mënyrë afatgjatë për të përballuar rritjen e kostove të energjisë”.
“Globe Shops” raportoi të ardhura 3 miliardë lekë, pothuajse në të njëjtin nivel me një vit më parë.
“Gjatë vitit 2024, shoqëria ‘Globe Shops’ SH.P.K. ka vijuar zhvillimin e aktivitetit të saj kryesor në tregun e pajisjeve elektronike dhe elektroshtëpiake duke ofruar produkte me cilësi të lartë dhe të pajisura me teknologji bashkëkohore.
Gjatë kësaj periudhe është vërejtur një rritje e ndjeshme e kërkesës për pajisje me efikasitet të lartë energjetik dhe teknologji të avancuar të tipit smart-home, e cila ka ndikuar pozitivisht në performancën e përgjithshme të shitjeve”, thuhet në raportin e aktivitetit.
Duke u mbështetur në këtë tendencë, shoqëria ka hartuar një strategji të qartë zgjerimi, e cila parashikon hapjen e njësive të reja tregtare deri në fund të vitit 2025.
Gjithashtu, kompania po eksploron mundësi për diversifikimin e portofolit të produkteve, duke shtuar kategori të reja dhe zgjidhje inovative për shtëpinë moderne, si teknologjitë smart-home, sistemet e menaxhimit të energjisë dhe pajisje me lidhje inteligjente.
“AZA Elektroshtëpiake” deklaroi qarkullim vjetor prej 2.7 miliardë lekësh, me rritje 8.2%.
“Go Tech” kishte të ardhura prej 2 miliardë lekësh, me zgjerim prej rreth 6% me bazë vjetore. Sipas raportit të ecurisë së biznesit, shoqëria synon të rritet me 8% këtë vit, si rrjedhojë e njësive të reja në Tiranë e rrethe dhe zgjerimit të sistemit franshise.
TREGU I VESHJEVE, NDIKIM POZITIV NGA TURIZMI
Segmenti i tregtimit të veshjeve po shënon rritje, pas hyrjes dhe zgjerimit të markave të huaja, që po konkurrojnë në tregun e çorganizuar dhe me nivel të lartë informaliteti. Veshjet janë një tjetër sektor që po ndikohen pozitivisht nga turizmi.
“ITX ALBANIA”, në pronësi të grupit “Zara Holding B.V.”, kishte të ardhura rreth 7.2 miliardë lekë, me rritje 10.5% në raport me vitin e mëparshëm duke qenë më e madhja e tregtimit të veshjeve në vend.
Kompania aktualisht menaxhon 8 dyqane për 6 marka të ndryshme: “ZARA”, “ZARA Home”, “Bershka”, “Stradivarius”, “Pull & Bear” dhe “Massimo Dutti”.
Ndryshe nga vitet e kaluara, kur shitjet online ishin në rritje, në 2024-n konsumatorët duket se kanë preferuar që t’i vizitojnë dyqanet fizikisht.
Sipas raportit të aktivitetit, për vitin 2024, shitjet online përfaqësojnë 19% të shitjeve totale, nga 25% në vitin 2023 dhe 18% në vitin 2022.
Shuma e shitjeve online e përkthyer në Lek është 1.36 miliardë lekë, nga 1.64 miliardë lekë në 2023.
“LC Waikiki Retail AL” kishte qarkullim vjetor në vitin 2024 prej 6.2 miliardë lekësh, me rritje 11.8% me bazë vjetore, duke u renditur në operatorin e dytë më të madh të tregtimit të veshjeve në vend. Kompania është e përqendruar në segmentin e tregimit të veshjeve të lira.
Mehmet Memo Menaxher i LC Waikiki për Shqipërinë dhe Maqedoninë e Veriut pohon se turistët kanë një ndikim të madh në shitjet gjatë sezonit veror.
“Ka një rritje të dukshme të kërkesës për veshje nga turistët, veçanërisht në qytetet bregdetare si Durrësi dhe Vlora, ku volumi i shitjeve është më i lartë. Këto qytete janë destinacione të njohura turistike dhe prania e një numri të madh turistësh ka kontribuar në rritjen e shitjeve”.
“Kid Zone” (“Jumbo”) me aktivitet në tregtimin me pakicë (lodra, veshje për fëmijë, mjete kancelarie, rroba, dekorues dhe orendi të ndryshme shtëpiake) pa rritje të qarkullimit vjetor me 14.8%, në 3.2 miliardë lekë.
Sipas raportit të aktivitetit, “2024-a ka qenë një vit me ecuri të mirë financiare.
Ky rezultat është rrjedhojë e shtrirjes së rrjetit të dyqaneve ‘Jumbo’ në gjithë territorin e Shqipërisë. ‘Kid Zone’ ka performuar gjatë vitit 2024 me 9 dyqane të shtrira në qytetet kryesore të Shqipërisë”.
Sipas raportit, pritshmëritë ishin më të larta, por gjithsesi ka pasur ndikim negativ të inflacionit, ku si pasojë u rritën kostot e lëndëve të para dhe gjithashtu u ul fuqia blerëse e konsumatorëve.
Në mars të vitit 2023, në tregun shqiptar hynë edhe veshjet e markës “H&M”, i cili është shitësi i dytë më i madh ndërkombëtar i veshjeve, pas “Inditex”, kompania mëmë e “Zara”.
Në Shqipëri, operatori nuk ka pasur një rritje të shpejtë, ndryshe nga aktiviteti i “Inditex”.
“H & M Hennes & Mauritz Albania SH.P.K” nuk e ka deklaruar bilancin e vitit 2024, por sipas të dhënave paraprake nga Tatimet ka qarkulluar rreth 700 milionë lekë.
Të ardhurat e tij janë më të ulëta se linja “Defacto”, që kishte 772 milionë lekë të ardhura në 2024-n.
“In Sport”, më e madhja në tregtimin e këpucëve e veshjeve sportive, raportoi të ardhura prej rreth 2 miliardë lekësh, pothuajse në të njëjtat nivele me një vit më parë.
“Shoqëria ‘In Sport’ sh.p.k. synon të ruajë dhe konsolidojë pozitën në fushën e tregtimit të artikujve dhe veshjeve sportive, si dhe aksesorët sportivë duke u përshtatur me ndryshimet në mjedisin e biznesit, teknologjinë, mundësive për financim”, thuhet në raportin e aktivitetit.
“Ndryshimet demografike dhe ekonomike po ndikojnë ndjeshëm në aktivitetin e tregut dhe në kërkesën për produktet sportive, duke sjellë sfida dhe mundësi të reja.
Një gjeneratë e re, e orientuar drejt stilit të jetesës aktive dhe të shëndetshme, po ndikon në rritjen e interesit për veshje dhe atlete sportive.
Gjithashtu, rritja e ndërgjegjësimit mbi trendet globale ka shtuar kërkesën për brande të njohura, produkte të reja e të sigurta që përputhen me stilin modern të jetesës”, pohon Semi Gjyli, menaxherja ekzekutive e “Sport Vision Group” (emri tregtar i “In Sport”).
Lexoni edhe:
200 VIP-at e 2024-s; Në “kurthin” e punonjësve
Postimi ” Tregtia me pakicë, rriten supermarketet; turizmi nxit veshjet ” eshte marre nga Revista Monitor.
