Janë dhjetë depozitues të mëdhenj në vend që zënë 7.35% të totalit të depozitave të sistemit bankar, sipas raportit vjetor të Mbikëqyrjes së bankës së Shqipërisë, që mat përqendrimin e depozituesve më të mëdhenj. Përqendrimi ka rënë, përkundrejt 8.04% që zinin në dhjetor 2023.
Depozitat e individëve mbeten baza kryesore e depozitave të sistemit, me një peshë prej 78.4% të totalit të depozitave, por me rritje rreth 0.8 pikë përqindjeje krahasuar me një vit më parë.
Gjatë këtij viti, ritmet më të larta në rritje i ka pasur sektori publik e sektori individ (përkatësisht 6.3% dhe 5.9%), ndërsa sektori privat ka njohur një rritje me 0.2%.
Depozitat e klientëve mbeten burimi kryesor i financimit për sistemin bankar shqiptar, me një peshë prej 80.5% (81.7% në dhjetor 2023) të totalit të pasivit.
Sipas BSH-së, në dhjetor 2024, vlera totale e depozitave të sistemit arrin në 1.683 miliardë lekë, me një rritje vjetore prej 4.87% krahasuar me një vit më parë.
Pesha e monedhës vendase në totalin e depozitave është rritur në 47.6%, nga 46.6% në dhjetor 2023. Struktura e tipologjisë përgjatë vitit 2024 reflekton një rritje më të lartë në depozita me afat, pasuar nga llogaritë rrjedhëse, ndërkohë që depozitat pa afat kanë njohur një rritje të lehtë.
Struktura e maturiteteve peshon në afatet më të shkurtra, ndërsa viti 2024 ka njohur një zhvendosje në drejtim të afateve më të gjata.
Gjysma e depozitave jepen kredi
Sipas Bankës së Shqipërisë, raporti kredi/depozita, në dhjetor 2024, paraqitet në nivelin 49.55% (dhjetor 2023: 46.07%) dhe reflekton një strukturë të aktiv-pasiveve që krijon lehtësi në administrimin e likuiditetit, si dhe stimuj potencialë në kredidhënie.
Gjatë vitit 2024, treguesi është zgjeruar, për shkak të ritmeve të ndryshme të ecurisë së portofolit të kredisë dhe totalit të depozitave (ku portofoli i kredisë ka njohur rritje më të lartë, kundrejt rritjes së depozitave).
Raporti midis monedhës vendase dhe monedhave të huaja, gjatë këtij viti, është më i lartë në monedhën vendase, në nivelin 57%, ndërsa valuta në nivelin 43%. Treguesit, si në valutë ashtu edhe në monedhën vendase, kanë njohur zgjerim kundrejt një periudhe më parë.
Postimi ” 10 depozitues kanë 7.35% të totalit të depozitave në banka ” eshte marre nga Revista Monitor.
