Kompania shqiptare e sigurimeve Eurosig nga kjo javë është bërë aksionerja e vetme e Bankës së Bashkuar së Shqipërisë, duke përfunduar një proces gradual blerjeje të nisur që në vitin 2019. Më tërheqjen e Bankës Islamike për Zhvillim, kemi rritje të mëtejshme të peshës së bankave ma kapital shqiptar, të cilat zotërojnë aktualisht më shumë se 35% të tregut.
Kompania shqiptare e sigurimeve Eurosig nga kjo javë është bërë aksionerja e vetme e Bankës së Bashkuar së Shqipërisë. Lajmi është bërë publik nga vetë Banka, e cila ka njoftuar se në këtë mënyrë kompania shqiptare e sigurimeve ka marrë nën kontroll kuotën e mbetur të aksioneve të Bankës Islamike për Zhvillim, duke e marrë në zotërim 100%. Bëhet fjalë për një proces blerjeje të nisur nga Eurosig që në vitin 2019, i përfunduar këtë javë, me daljen tërësisht nga investimi të Bankës Islamike për Zhvillim.
Eurosig hyri në UBA Bank në gusht të vitit 2019, duke blerë 9 % të aksioneve nga Banka Islamike për Zhvillim (IsDB),me çmimin e mbi 1 milion USD. Pjesa e mbetur e aksioneve të kapitalit zotërohej nga Ithmaar Bank nga Bahreini dhe disa aksionarë të vegjël individual, kryesisht nga Arabia Saudite. Deri në fund të vitit 2020 Eurosig zotëronte 21.02% të kapitalit të Bankës së Bashkuar të Shqipërisë (UBA) duke u bërë aksionari i dytë më i madh pas Bankës Islamike për Zhvillim,e cila kontrollonte 72.2% të kapitalit të bankës.
Në korrik 2021 Eurosig pagoi për blerjen e aksionvee shtesë të Uba Bank, bazuar në marrëveshjen e blerje aksione nga aksionari IsDB (Banka Islamike për Zhvillim). Pas kësaj blerje kapitali i Bankës së Bashkuar të Shqipërisë (UBA) zotërohej me mbi 51% nga aksionarë vendas. Gjatë 6MI 2023 Eurosig kontribuoi me 5.33 miliard lekë në shtesën e kapitalit UBA si edhe gjatë muajit gusht 2023 me 2.1 miliard shtesë (afërisht 70 milionë euro), duke i paraqitur “Investimet në aksione” në 56 miliard lekë nga 48.67 miliard siç paraqiteshin më 31.12.2022.
Aktualisht, nën kontrollin e Bankës nga Arabia Saudite kishin mbetur 14.73% e aksioneve. Dalja e plotë nga investimi e Bankës Islamike pritet të sjellë ndryshime rrënjësore në mënyrën e operimit të saj, por edhe klientelës së targetuar. Në këta vite, Banka e Bashkuar e Shqipërisë e ka organizuar aktivitetin në përputhje me vlerat etike të Islamit.
Por ç’është më e rëndësishmja, blerja e 100% të kuotave të Bankës së Bashkuar, rrit më tej peshën e bankave me kapital shqiptar në vend. Aktualisht kemi 5 banka me kapital shqiptar në tregun tonë financiar; Banka Tirana sh.a, Banka Credins sh.a., Banka Union sh.a., Banka Amerikane e Investimeve; sh.a., dhe tashmë Banka e Bashkuar e Shqipërisë sh.a, e cila u vu nën kontrollin e aksionerit shqiptar që në vitin e shkuar me 51% të kuotave. Me transferimin e fundit të aksioneve, Këto banka zotërojnë rreth 35% të totalit të aktiveve të sektorit.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
