Banka Qendrore e Kosovës ka parashikuar që norma mesatare e inflacionit për vitin 2025 të arrijë në 3.3%, kryesisht e nxitur nga konsumi privat dhe investimet. Po ashtu, rritja ekonomike pritet të jetë 4.1%.
Ekonomia e Kosovës pritet të vijojë rritjen e saj në vitin 2025, me një normë parashikuese prej 4.1%, ndërsa inflacioni mesatar mund të arrijë në 3.3%.
Parashikimi vjen nga Banka Qendrore e Kosovës në edicionin e 21-të të Raportit të Stabilitetit Financiar, ku theksohet se rritja do të udhëhiqet kryesisht nga konsumi privat dhe investimet.
Ndërkaq, ky institucion parashikon një rritje ekonomike prej 4.1%.
Sipas BQK-së, konfirmohet qëndrueshmëria dhe stabiliteti i sistemit financiar të Kosovës, mbikëqyrja prudente rregullative dhe praktikat efektive të menaxhimit të rrezikut.
Megjithatë, BQK thotë se këto arritje mbeten të ekspozuara ndaj pasigurive ekonomike globale, duke kërkuar një vëmendje të vazhdueshme.
“Ekonomia e Kosovës u rrit me 4.4% në vitin 2024, e mbështetur nga konsumi privat, investimet dhe eksportet. Norma vjetore e inflacionit zbriti në nivelin prej 1.6 %, kryesisht si rezultat i uljes së çmimeve të ushqimeve dhe mallrave të importuara.
Për vitin 2025, BQK parashikon një rritje ekonomike prej 4.1% dhe një normë mesatare të inflacionit prej 3.3%, të nxitur kryesisht nga konsumi privat dhe investimet”, u tha në këtë raport.
BQK thotë se sektori fiskal shënoi performancë të qëndrueshme, me deficit minimal dhe ulje të raportit të borxhit publik ndaj BPV-së.
“Megjithatë, thellimi i deficitit të llogarisë rrjedhëse, si dhe trendet e remitancave dhe të investimeve të huaja direkte mbeten sfida strukturore që kërkojnë vëmendje dhe monitorim të shtuar”, thuhet më tej në raport.
Ndërkaq, theksohet se sistemi financiar i Kosovës vazhdoi zgjerimin në vitin 2024, duke përforcuar rolin e tij në mbështetje të ekonomisë vendore.
“Sektori bankar shënoi rritje të shpejtë të kreditimit prej 18.3%, e nxitur nga kërkesa e lartë për financim nga ekonomitë familjare dhe bizneset, si dhe nga përmirësimi i kushteve kreditore”.
Raporti thekson gjithashtu se sektori fiskal shënoi performancë të qëndrueshme, me deficit minimal dhe ulje të borxhit publik në raport me BPV-në.
Megjithatë, thellimi i deficitit të llogarisë rrjedhëse, si dhe luhatjet në remitanca dhe investimet e huaja direkte, mbeten sfida që kërkojnë monitorim të vazhdueshëm.
Këto të dhëna janë publikuar në edicionin e 21-të të Raportit të Stabilitetit Financiar (RSF), i cili paraqet një vlerësim të detajuar dhe të bazuar mbi zhvillimet më të fundit në sistemin financiar të vendit, sfidat me të cilat përballet si dhe perspektivat për periudhën e ardhshme.
Kurse, gjatë ditës së djeshme Agjencia e Statistikave të Kosovës ka treguar se çmimet e konsumit në Kosovë kanë vazhduar trendin rritës edhe gjatë muajit korrik 2025, duke e çuar inflacionin vjetor në 4,3%, ndërsa ai mujor ka arritur 0,2%.
Ky nivel inflacioni mbetet dukshëm mbi objektivin e konsideruar ideal prej rreth 2%, që përdoret si standard në ekonomitë e zhvilluara dhe në zhvillim.
Sipas raportit të ASK-së, në krahasim me korrikun e vitit të kaluar, rritja e çmimeve është ndikuar kryesisht nga disa kategori kryesore të mallrave dhe shërbimeve.
Ndër to, rritjen më të madhe e kanë pësuar pushimet e organizuara me +20,9%, pasuar nga kafeja, çaji dhe kakaoja me +16,9%, si dhe energjia elektrike me +16,6%. Po ashtu, çmime më të larta janë regjistruar te produktet ushqimore bazë si mishi (+12,7%), pemët (+12,3%) dhe perimet (+10,7%).
Shtrenjtim është vërejtur edhe tek shërbimet e transportit (+10,4%), mirëmbajtja e pajisjeve personale (+10,2%), vajrat dhe yndyrat, shërbimet hoteliere, shërbimet ambulantore, produktet e qumështit, pijet alkoolike dhe shërbimet financiare.
Postimi ” Banka Qendrore parashikon rritje të inflacionit prej 3.3% në Kosovë ” eshte marre nga Revista Monitor.
