Komisioni Europian nuk po e merr në konsideratë idenë e ndryshimit të politikave europiane për të reduktuar emetimet e dioksidit të karbonit të makinave, pavarësisht presioneve të grupit kryesor politik të BE për të dobësuar ligjet – deklaroi sot për Reuters, përgjegjësi i politikës klimatike të bllokut.
Partia Popullore Europiane e qendrës së djathtë – grupi më i madh i ligjvënësve të Parlamentit Europian – nisi një fushatë këtë javë, për të dobësuar rregullat mbi klimën, duke shtuar presionin ndaj Brukselit nga ana e shtëpive automobilistike dhe qeverive kombëtare për të ndihmuar menjëherë sektorin automobilistik europian në vështirësi.
Pyetjes nëse ishte duke vlerësuar ndryshimet e rregullave mbi emetimet e CO2 nga makinat, komisioneri i Bashkimit Europian për klimën, Ëopke Hoekstra, iu përgjigj jo.
“Jo. Përgjigjja është jo” – tha ai për Reuters në një event industrial të zhvilluar në Bruksel.
Hoekstra, ashtu si Presidentja e Komisionit Europian, Ursula von der Leyen, janë pjesë e grupit politik të PPE.
Sektori automobilistik europian është në një situatë të vështirë, me mijëra vende pune të cilat rrezikohen të mbyllen për shkak të dobësimit të kërkesës, rritjes së konkurrencës nga Kina dhe shitjeve më të ulëta se sa pritej të automjeteve elektrike.
Brukseli deklaroi se rregullat mbi klimën janë të nevojshme për të arritur objektivat ligjërisht të detyrueshme të Europës për emetimet dhe krijojnë një mjedis të parashikueshëm për investimet e kompanive europiane.
Kërkesa kryesore e PPE është që shtëpive automobilistike t’u jepet një lehtësim nga kufizimet e CO2 në vitin 2025, të cilat pritet se nuk do të respektohen nga shumë.
Shoqata europiane e shtëpive automobilistike ACEA deklaroi se industria rrezikon 15 miliardë euro gjoba nëse nuk arrin objektivat e 2025, të cilat sipas saj do të devijonin paratë nga investimet.
/ Reuters
Postimi ” “BE nuk dorëzohet para presioneve mbi rregullat e CO2 të makinave” ” eshte marre nga Revista Monitor.
