Prodhimi i energjisë në tremujorin e tretë të vitit ka shënuar rënie në raport me një vit më parë si përsa i përket kompanisë publike ashtu edhe privatëve. Bilanci i energjisë i publikuar nga INSTAT për periudhën korrik-shtator tregon se gjatë kësaj periudhe, energjia elektrike në dispozicion u rrit me 6,9%.
“Prodhimi neto vendas i energjisë elektrike në këtë periudhë u ul me 2,9% duke arritur vlerën 1.565 GWh nga 1.611 GWh energji të prodhuar në tremujorin e tretë të vitit 2023. Ky prodhim u realizua nga hidrocentralet publike në masën 69,5%, nga hidrocentralet private dhe koncensionare në masën 18,7% dhe nga të tjerë prodhues në masën 11,8% të prodhimit neto vendas të energjisë elektrike” thuhet në publikim.
Në këtë panoramë krejtësisht të kundërt me një vit më parë rezulton një rritje e lehtë e importeve por një rënie e theksuar e eksporteve.
“Importi bruto i energjisë elektrike (energji në marrje), në tremujorin e tretë të vitit 2024, arriti vlerën 762 GWh nga 755 GWh që ishte në të njëjtën periudhë të një viti më parë, duke shënuar kështu një rritje me 1,0%. Eksporti bruto i energjisë elektrike (energji në dhënie) arriti vlerën 282 GWh nga 453 GWh, duke shënuar një rënie me 37,8%” vlerëson INSTAT.
HEC-et publike dhe private
Të dhënat e INSTAT tregojnë se hidrocentralet publike, në tremujorin e tretë të vitit 2024, prodhuan 1.088 GWh nga 1.236 GWh të prodhuar në tremujorin e tretë të vitit 2023, duke shënuar kështu një rënie të prodhimit me 11,9%.
Ndërkohë hidrocentralet private dhe koncensionare, prodhuan 292 GWh nga 346 GWh të prodhuar në të njëjtën periudhë të një viti më parë, duke shënuar një rënie të prodhimit të energjisë elektrike me 15,6%.
“Të tjerë prodhues, prodhuan 185 GWh nga 30 GWh të prodhuar në të njëjten periudhë të një viti më parë, duke shënuar një rritje të prodhimit të energjisë elektrike me 6.3 herë. Shkëmbimi i energjisë elektrike (diferenca mes eksportit dhe importit bruto të energjisë), në tremujorin e tretë të vitit 2024 ka arritur vlerën negative prej 481 GWh ndërsa në tremujorin e tretë të vitit 2023 kishte gjithashtu një vlerë negative prej 302 GWh”, thuhet në publikim.
Ndërkohë humbjet në rrjet arritën vlerën 344 GWh nga 328 GWh, duke shënuar kështu një rritje me 4,9%, krahasuar me tremujorin e tretë të vitit 2023. Humbjet në transmetim janë ulur me 1,4% ndërsa humbjet në shpërndarje janë rritur me 5,9%. Humbjet teknike në shpërndarje kanë shënuar një rritje me 11,3%, ndërsa humbjet jo teknike në shpërndarje kanë shënuar një rënie me 9,8%, krahasuar me tremujorin e tretë të vitit 2023.
“Përdorimi i energjisë elektrike nga konsumatorët, në tremujorin e tretë të vitit 2024, u rrit me 7,3% duke arritur vlerën 1.702 GWh nga 1.586 GWh që ishte në tremujorin e tretë të vitit 2023. Në rritjen e përdorimit të energjisë elektrike nga konsumatorët kanë ndikuar konsumatorët familjarë, ku kemi një rritje të konsumit të energjisë elektrike me 14,7%, ndërsa energjia e konsumuar nga konsumatorët jo familjarë është rritur me 1,0%”, thuhet në publikim.
Postimi ” Bilanci i energjisë korrik-shtator, bie prodhimi, rriten importet ” eshte marre nga Revista Monitor.
