Liderët e Serbisë dhe Kosovës arritën një marrëveshje për t’i dhënë fund mosmarrëveshjes së tyre për targat, sipas kryediplomatit të Bashkimit Europian. “Ne kemi një marrëveshje”, tha përfaqësuesi i lartë i BE-së për punët e jashtme, Josep Borrell në një postim në Twitter.
Rritja më e fundit e tensioneve ndërmjet dy palëve ka të bëjë me planin e Kosovës për të filluar gjobitjen e mijëra shoferëve që aktualisht kanë targa të Serbisë.
Ky veprim zemëroi serbët në veri të Kosovës, të cilët, ashtu si Beogradi, nuk e njohin shpalljen e pavarësisë së Kosovës në vitin 2008 nga Serbia. Shumë njerëz kanë dhënë dorëheqjen nga institucionet publike për të protestuar ndaj dispozitës së re, duke përfshirë qindra oficerë policie.
Marrëveshja e shpallur nga Borrell duket se është e ngjashme me marrëveshjen që presidenti serb Aleksandar Vuçiç dhe kryeministri i Kosovës Albin Kurti nuk arritën të hënën.
Borrell tha se Serbia ra dakord të ndalonte lëshimin e targave me emërtimin e qyteteve të Kosovës në to, ndërkohë që Kosova do të “ndalonte veprimet e mëtejshme në lidhje me riregjistrimin e automjeteve”.
Kurti kishte pezulluar më parë planin për gjobitjen e shoferëve me 48 orë për shkak të një kërkese të Shteteve të Bashkuara.
Presidentja e Kosovës Vjosa Osmani ndërkohë falënderoi SHBA-në në një postim në Twitter të mërkurën “për angazhimin e tyre aktiv në arritjen e marrëveshjes së sotme në Bruksel”.
Osmani e kishte akuzuar Borellin për paragjykim lidhur me deklaratën e tij që veçonte Kosovën për prishjen e marrëveshjes të hënën.
Borrell kishte kritikuar liderët të hënën për dështimin për arritjen e një marrëveshjeje, duke deklaruar se ai do të informonte vendet e BE-së dhe partnerët e tyre ndërkombëtarë për “sjelljen jokonstruktive të palëve dhe mungesën e plotë të respektimit të detyrimeve të tyre ligjore ndërkombëtare, dhe kjo vlen veçanërisht për Kosovën.”
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
