Inflacioni, edhe pse në mënyrë të ngadaltë, është në rënie. Për këtë arsye Banka e Shqipërisë vendosi të mos rrisë më tej, të paktën momentalisht, normën bazë të interesit. Guvernatori Gent Sejko komunikoi vendimin e Këshillit Mbikëqyrës, por duke nënvizuar se mund të nevojitet një shtrëngim në të ardhmen, nëse presionet ndaj çmimeve që vijnë kryesisht nga tregu i punës do të vazhdojnë.
Projeksionet e Bankës së Shqipërisë vlerësojnë se inflacioni mund të zbresë nën 3% gjatë pjesës së parë të vitit të ardhshëm. I pyetur ndërkohë për kursin e këmbimit, Sejko deklaroi se tregu po monitorohet, por përjashtoi një ndërhyrje të mundshme.
Sipas analizave të bankës, euro po bie për shkak të prurjeve nga turizmi, emigrantët dhe investimet e huaja, ndërsa rënia i bën importet më të lira, duke lehtësuar inflacionin.
Javën e ardhshme institucioni qendror monetar do të zhvillojë një takim me bankat, për të vlerësuar nëse forcimi i lekut krijon vështirësi për sektorin financiar apo për bizneset.
Raporti vjetor i BSH, Sejko: Borxhi publik u ul në 64.6% të prodhimit të brendshëm bruto
Burimi: A2 CNN
