Tregjet globale të aksioneve u rritën ndjeshëm, ndërsa çmimet e naftës pësuan rënie të fortë, pasi investitorët reaguan ndaj sinjaleve se lufta me Iranin mund të përfundojë brenda javësh.
Optimizmi u nxit nga deklaratat politike për një de-përshkallëzim të konfliktit, duke sjellë një rikuperim të fortë në bursat ndërkombëtare. Indeksi amerikan S&P 500 u rrit rreth 2.9%, ndërsa në Azi, tregjet reaguan edhe më fort, me Nikkei në Japoni që u rrit 5% dhe Kospi në Korenë e Jugut me 8%. Edhe në Europë, Stoxx 600 u rrit me 2.2% dhe FTSE 100 me 1.8%.
Në të njëjtën kohë, tregu i naftës reagoi në drejtim të kundërt. Çmimi i naftës Brent ra mbi 15%, duke zbritur në rreth 100-103 dollarë për fuçi, një nga nivelet më të ulëta të javës, pasi tregjet filluan të çmojnë një rrezik më të ulët për ndërprerje të furnizimit global.
Megjithatë, kjo rënie vjen pas një periudhe rritjeje shumë të fortë. Gjatë marsit, çmimet e naftës janë rritur me mbi 60%, duke kaluar në disa momente edhe 110–119 dollarë për fuçi, për shkak të sulmeve ndaj infrastrukturës energjetike dhe frikës për mbylljen e ngushticës së Hormuzit, nga ku kalon rreth 20% e furnizimit global me naftë. Edhe pas korrigjimit të fundit, tregu mbetet i paqëndrueshëm.
Në disa ditë, çmimet kanë lëvizur në të dy drejtimet, madje duke u rritur sërish me rreth 2% në fillim të prillit, çka tregon se rreziku gjeopolitik nuk është zhdukur plotësisht.
Rënia e naftës ka mbështetur aksionet, sidomos sektorët që varen nga energjia, si transporti dhe industria, pasi kostot më të ulëta përkthehen në marzhe më të larta dhe aktivitet më të fortë ekonomik.
Megjithatë, analistët paralajmërojnë se ky është më shumë një reagim ndaj pritshmërive sesa një reflektim i një zgjidhjeje të konfirmuar. Nëse tensionet rikthehen ose furnizimet mbeten të kufizuara, çmimet e energjisë mund të rriten sërish, duke rikthyer presionet inflacioniste dhe pasigurinë në tregje.
Për momentin, tregjet po sinjalizojnë një “frymë lehtësimi”, por mbeten shumë të ndjeshme ndaj çdo zhvillimi të ri në Lindjen e Mesme./ The Guardian
Postimi ” Bursat rriten me shpresën për fundin e luftës me Iranin; nafta bie drejt 100 dollarëve për fuçi ” eshte marre nga Revista Monitor.
