Presidenti dhe drejtori ekzekutiv i Forumit Ekonomik Botëror, Børge Brende, njoftoi të enjten se do të largohet nga detyra, vetëm pak javë pasi forumi nisi një hetim të pavarur mbi marrëdhëniet e tij me Jeffrey Epstein.
Brende, i cili mori drejtimin e WEF në vitin 2017, e bëri publik vendimin përmes një deklarate, pas publikimeve të Departamentit të Drejtësisë të SHBA-së që treguan se ish-ministri i Jashtëm i Norvegjisë kishte marrë pjesë në tre darka biznesi me Epstein dhe kishte komunikuar me financierin e diskredituar përmes emailit dhe mesazheve.
“Pas një reflektimi të kujdesshëm, kam vendosur të largohem nga posti i Presidentit dhe CEO-së së Forumit Ekonomik Botëror. Tetë vite e gjysmë në këtë rol kanë qenë një përvojë jashtëzakonisht e vlefshme,” tha ai.
“Jam mirënjohës për bashkëpunimin me kolegët, partnerët dhe të gjithë bashkëpunëtorët tanë, dhe besoj se tani është momenti që Forumi të vijojë punën e tij të rëndësishme pa shpërqendrime,” shtoi Brende. Në deklaratën e tij ai nuk e përmendi Epstein.
Në një reagim të veçantë, bashkëkryetarët e forumit me bazë në Gjenevë, Andre Hoffmann dhe Larry Fink, njoftuan se rishikimi i pavarur i kryer nga këshilltarë të jashtëm mbi lidhjet e Brende me Epstein ka përfunduar.
Sipas tyre, gjetjet nuk identifikuan shqetësime të reja përtej atyre që ishin bërë tashmë publike.
Ata bënë të ditur gjithashtu se Alois Zwinggi do të marrë përkohësisht detyrën e presidentit dhe CEO-së, ndërsa Bordi i Besuarve do të mbikëqyrë tranzicionin e lidershipit dhe procesin për përzgjedhjen e pasuesit të përhershëm./ CNBC
Postimi ” CEO i Forumit Ekonomik Botëror jep dorëheqjen pas hetimit të lidhjeve me Epstein ” eshte marre nga Revista Monitor.
