Probleme me Instagramin. Përmes Twitter, shumë abonentë kanë raportuar pezullimin e llogarisë së tyre pa ndonjë arsye. Me hyrjen në rrjetin social, ata u gjendën përballë një ekrani ku shkruhej: “Ju pezulluam llogarinë në datën 31 tetor 2022. Keni 30 ditë kohë për të komunikuar mospajtimin tuaj me këtë vendim”.
Ndërsa për shkaqet e mundshme të pezullimit lexohet se: “Llogaria juaj nuk respekton udhëzimet tona të komunitetit. Nëse nuk konfirmojmë llogarinë tuaj, ajo do të çaktivizohet përgjithmonë”. Prandaj, pa një vendim të mëtejshëm të Instagramit, përdoruesi nuk do të mund të përdorë rrjetin social dhe profili i tij nuk do të jetë i dukshëm për ndjekësit e tij. Edhe ata që nuk kanë marrë raporte të tilla, kanë vështirësi në përditësimin e postimeve dhe në shikimin dhe dëgjimin e story-t, apo po humbasin ndjekësit.
Por çfarë po ndodh? Hipoteza më e besueshme është se Instagram po bën një lloj pastrimi të përgjithshëm për të eliminuar të gjitha llogaritë e rreme, por gjithashtu po pezullon profilet që janë reale. Një aspekt të cilit duhet t’i kushtohet vëmendje e veçantë ka të bëjë me përpjekjet për të rikuperuar profilin. Përpjekja shumë herë për të rikuperuar foto, video dhe histori mund të ketë efektin e kundërt, që është bllokimi përfundimtar.
Nga ana e tij, rrjeti social u ka kërkuar falje përdoruesve që kanë probleme me aksesin. “Ne jemi të vetëdijshëm se disa prej jush kanë probleme me aksesin në llogarinë tuaj në Instagram. Ne jemi duke hetuar dhe kërkojmë ndjesë për shqetësimin”, thuhet në një shënim nga kompania.
Këto janë ditë të vështira për aplikacionet Meta. Mëngjesin e 25 tetorit, përdoruesit kishin raportuar probleme të mëdha në përdorimin e WhatsApp . Për të paktën tre orë aplikacioni më i përdorur i mesazheve ishte jashtë përdorimit, duke mos lejuar dërgimin apo marrjen e mesazheve nga miqtë, të afërmit ose kolegët e punës.
Burimi: A2 CNN
