Lojëra me urinë. Ushqimet me “shumë proteinë” janë moda e re që ka zëvendësuar ushqimet “me pak kalori”, shkruan The Economist
Në raftet e seksionit të ushqimeve të shpejta të supermarketeve, përveç patatinave, tani mund të gjenden me shumicë qiqra të pjekura, djathë i shkrirë dhe çibukë me mish viçi.
Krahas ushqimeve me pak yndyrë dhe sheqer, po shfaqen shumë ushqime të pasura me proteina. Seksionet e bulmetit janë të mbushura me ushqime të vështira për t’u shqiptuar, si skyr dhe kefir.
Kjo për shkak se dietat e pasura me proteina kanë hyrë në modë. Në mediat sociale, influencuesit e ushqyerjes dhe fitnesit po këshillojnë marrjen e shumë proteinave.
Njerëzit e famshëm kanë sjellë në modë trupin e fortë muskuloz, jo fizikun e dobët. Kjo prirje duket se po merr përmasat e një fiksimi.
Kërkimet në Google për “dietë me proteina të larta” arritën pikën më të lartë në janar. Rreth 64% e amerikanëve duan të rrisin sasinë e proteinave që hanë, sipas shoqërisë kërkimore Hartman Group, duke lënë pas lëndët ushqimore që janë parapëlqyer historikisht, si fibrat dhe drithërat (shih grafikun).
Në supermarketin online Britani Ocado, mbi 40% e konsumatorëve kanë blerë më shumë ushqime të pasura me proteina gjatë vitit të kaluar. Si shpjegohet kjo dëshirë?
Të pasionuarit e palestrës kanë konsumuar proteina për dekada. Kohët e fundit, edhe të tjerët kanë kuptuar se proteinat mund t’i ndihmojnë të ndërtojnë muskuj dhe të ndihen më të ngopur për më gjatë.
Shoqëria kërkimore Kantar vlerëson se shpenzimet në supermarketet britanike për produkte ushqimore sportive të pasura me proteina, si ato në formë bari dhe pluhuri, arritën në 143 milionë paund (182 milionë dollarë) në 12 muajt deri në shkurt, pothuajse dy herë më shumë se në të njëjtën periudhë tre vite më parë.
Juergen Esser i kompanisë gjigante franceze të qumështit, Danone, thotë se dëshira e të rinjve për proteina, nisi për shkak se ata dëshironin të dukeshin më muskulozë.
Ajo pastaj u përhap me shpejtësi te më të moshuarit që donin të mbanin trupin në formë. Pandemia bëri që njerëzit të shqetësoheshin për shëndetin dhe nxiti kërkesën për proteina.
Tani, firmat ushqimore po parashikojnë një rritje të interesit për proteina, edhe nga përdoruesit e barnave GLP-1, si Ozempic, të cilat ulin oreksin.
Popullariteti i ilaçeve të tilla për humbje peshe po rritet me shpejtësi. Mbi 8% e amerikanëve po merrnin injektimin GLP-1 vitin e kaluar, sipas firmës së të dhënave Numerator. Përqindja po rritet edhe në vendet e tjera të pasura.
Përdoruesit e këtyre ilaçeve për humbje peshe, po humbasin muskuj së bashku me dhjamin, prandaj shumë po kërkojnë proteina për të tonifikuar trupin.
Një studim nga Universiteti Cornell ka zbuluar se kur të paktën një njeri në familje fillon të marrë injektimin GLP-1 për uljen e oreksit, shpenzimet e familjes për ushqime bien mesatarisht me 5.5%.
Gara për proteina
Gama e ushqimeve me proteina të larta që ofrohen në supermarkete është zgjeruar shumë, sidomos pijet “shake” që bëhen për ata që ushtrohen rregullisht në palestër, tashmë edhe me paketime “hiper-mashkullore” me ngjyra të errëta dhe emra markash si Barebells dhe Grenade.
Bizneset ushqimore kanë hedhur në treg një sërë produktesh të reja.
Kompania zvicerane Nestlé po shet pica dhe makarona të ngrira, të pasuruara me proteina shtesë. Kompania amerikane Conagra Brands, kohët e fundit, hodhi në treg një sërë ushqimesh të gatshme, të etiketuara si “miqësore për ilaçin GLP-1”. Edhe çokollata Mars po nxjerr versionet me proteina të larta.
Produktet me proteina të larta po i ndihmojnë firmat të rriten. Të ardhurat e kompanisë Danone u rritën me 4.3% në vitin 2024, të nxitura nga kosi dhe pijet e pasuruara me shumë proteina.
Shitjet e firmës nga ushqimet e pasuruara me proteina janë rritur në 1 miliard euro (1.1 miliardë dollarë), nga rreth 400 milionë euro në vitin 2021, duke tejkaluar rritjen e biznesit në përgjithësi.
Pyetja është nëse kjo prirje ka shkuar shumë larg. Të gjithë kanë nevojë për proteina për të ruajtur muskujt, për të kontrolluar nivelin e sheqerit në gjak dhe nevoja të tjera. Por nuk është e sigurt sa të sakta mund të jenë pretendimet që kanë të bëjnë me sasinë.
Organizata Botërore e Shëndetësisë këshillon 0.83 gram në ditë proteina për çdo 1 kilogram të peshës trupore. Sipas kësaj mase, një amerikan ose britanik i zakonshëm, po konsumon shumë proteina.
Për firmat ushqimore që po përpiqen të ndjekin kërkesat e konsumatorëve, ka edhe një vështirësi tjetër. Konsumatorët nuk duan vetëm më shumë proteina dhe më pak ushqime të përpunuara, por edhe më shumë ushqime që janë me bazë bimore dhe të mira për zorrët.
Kompania ushqimore Danone po punon për të krijuar produkte qumështi “hibride” që ndërthurin proteinat e zakonshme të qumështit, me llojin me bazë bimore, që mund të jetë më i lehtë për t’u tretur dhe më ekologjik për planetin. Biotiful Gut Health, një prodhues i kefirit, është përqendruar në produktet me proteina të larta dhe me përbërës natyralë.
Kompania britanike e ushqimeve, The Curators, ka eksperimentuar me disa lloje. Kur ajo filloi të prodhonte patatina nga soja dhe thjerrëzat, shtoi dhjetë gramë proteina për qese. Recetat me më shumë proteina se kaq, nuk ishin të shijshme.
Dhe ndërsa modat e ushqimit shkojnë e vijnë, kërkesa më e qëndrueshme nga të gjitha, do të mbetet shija e mirë./ Përktheu: Lira Muça
Postimi ” Dëshira e njerëzve për proteina po rrit fitimet e bizneseve ushqimore ” eshte marre nga Revista Monitor.
