Ibrahimaj deklaroi se Këshilli i Ministrave në mbledhjen e fundit ka miratuar edhe një vendim që lidhet me mbrojtjen e konsumatorit në fushën e tregtisë online. Nëpërmjet këtij projektligji janë bërë saktësime për kohën e kthimit të produktit dhe shërbimin e pagesave.
“Miratuam një vendim i cili lidhet me mbrojtjen e konsumatorit në fushën e tregtisë online. Ka pasur shumë zhvillime në vitet e fundit në dixhitializim dhe investime në këtë fushë ne sektorë të ndryshëm, sidomos në atë të shërbimeve.
Vendimi që kaluam sot ka të bëjmë me tregtinë elektronike, me tregtinë online. Gjatë pandemisë kemi pasur një rritje të fluksit të kësaj kategorie, dhe pas pandemisë duket që konsumatorët janë mësuar më ketë formë tregtie dhe kanë vazhduar ta përdorin këtë formë, e cila i jep akses jo vetëm në tregjet kombëtare por edhe në ato ndërkombëtare.
Vendimi ka të bëjë me disa saktësime që duhet të kenë kontratat e këtij lloji tregtimi, me qëllim që konsumatori kur blen një produkt apo shërbim online të jetë i mbrojtur.
Ka të bëjë me saktësimin e periudhës së kthimit, kur një konsumator blenë një produkt ka të drejtë që brenda 14 ditëve ta kthejë. Një tjetër saktësim ka të bëjë me shërbimin e pagesave. Vitin e kaluar ka pasur një ndryshim në ligjin e pagesave, dhe nëpërmjet këtij projektvendimi saktësohet dhe ka një siguri më të lartë në shërbimit të pagesave të konsumatorëve”.
Çfarë do të ndodhë me bizneset online që funksionojnë pa Nipt, pra nuk janë subjekt tatimor?
“Ne kemi ngritur një grup pune i cili është në bashkëpunim edhe me autoritetin që kontrollon subjektet online dhe tregtinë online, i cili ka për qëllim që në mënyrë me inteligjente të gjurmojë këto subjekte nëpërmjet metodave hetimore, në bashkëpunim me DPT, dhe me Sektorin e Krimit Ekonomik në Policinë e Shtetit.
Me futjen e fiskalizimit të gjitha faturat do të jenë të deklaruara online. Gjurmimi nuk bëhet vetëm nëpërmjet lëshimit të faturave, por edhe nëpërmjet transaksioneve bankare. Pra ka një Task Forcë, e cila është ngritur e cila ka për qëllim gjurmimin dhe identifikimin e këtyre subjekteve të cilat janë pa NIPT, pa regjistruara, të pa licencuara për të dhënë shërbimet e duhura”, bëri të ditur ministrja.
