Industria nxjerrëse, tregu bankar dhe pasuritë e paluajtshme janë sektorët që po tërheqin fondet më të mëdha nga jashtë. Të dhënat e Bankës së Shqipërisë për investimet e huaja direkte tregojnë se në këto tre degë të ekonomisë u regjistruan në fillim të vitit mbi 56% të investimeve totale prej mbi 308 milionë eurosh.
Zbulimet në nëntokën shqiptare dhe çmimet relativisht të favorshme në bursa po zgjerojnë investimet e kompanive të huaja në nivelet më të larta që pas pandemisë. Holandezët e Shell janë një ndër investitorët kryesore në këtë sektor, teksa Holanda figuron e para në listën e investitorëve, për shkak se shumë kompani janë të regjistruara në këtë vend, përfshirë edhe norvegjezët e Statkraft që operojnë hidrocentralet e Banjës dhe Moglicës.
Por në gjeografinë e investimeve, italianët dhe turqit po rriten në klasifikim. Qoftë përmes zgjerimit të aktivitetit në kompani ekzistuese në fusha të ndryshme, por edhe përmes investimit në prona.
Ndërsa për herë të parë që prej nisjes së projektit të gazsjellësit TAP, investimet nga Zvicra, ku kompania është e regjistruar, u regjistruan në vlerë zero.
Pas futjes në tregun bankar dhe atë të telekomunikacionit, edhe hungarezët kanë ngadalësuar ritmin e investimeve. Ndërsa një ngadalësim për periudhën Janar-Mars u shënua edhe tek tregu i real estate. Ndonëse sektori i tretë për nga pesha, me 48.6 milionë euro investime në fillimvit, zbriti në vlerën më të ulët që prej fillimit të vitit 2021. Megjithëse agjentët imobiliarë e lidhin këtë ngadalësim me rritjen e interesave bankare dhe jo me një rënie të interesit për të blerë prona në Shqipëri.
Burimi: A2 CNN
