Ola Mitre /
Pas tenderit ndërkombëtar për blerjen e 21 mijë ton karburant, Korporata Elektroenergjetike Shqiptare ka hapur edhe 2 tenderë të tjerë për marrjen e shërbimeve, me qëllim vënien në funksion të 2 TEC-eve lundrues, që janë pozicionuar në Triport të Vlorës. Tenderi i parë përfshin shërbimin e evadimit të mbetjeve hidrokarbure, që do të gjenerohen nga djegia e karburantit dhe ka një fond limit prej 32.8 mln lekë. Ndërkohë që, tenderi i dytë përfshin shërbimin e transportit të lëndës djegëse nga depozita, që është Petrolifera Italo – Shqiptare, në TEC-et lundrues, me një fond limit prej 11.25 mln lekë. Në total, fondi limit i vënë në dispozicion për të 2 tenderët arrin në rreth 44 mln lekë.
Në dokumentet e tenderit, KESH specifikon se gjatë 2 viteve të funksionimit të TEC-eve do të harxhohen 25 mijë ton karburnat, teksa nga përllogaritjet historike të bëra prej kontraktorit Renco s.p.a, për një kapacitet ditor prodhimi të plotë prej 17 motorësh, mbetjet e lëndës djegëse përllogariten në 12 m3/ditë. Po ashtu, nga do të gjenerohen edhe 6.9 m3/muaj mbetje vajrash lubrifikantë, në rastin kur asetet gjeneruese punojnë pa ndërprerje me kapacitet të plotë.
Po ashtu, përcaktohet se periudha e ofrimit të shërbimit do të jetë për një periudhë 2-vjeçare ose deri në përfundimin e konsumit të sasisë së lëndës djegëse prej 25,000 ton, edhe pse procedura e hapur para disa ditës nga KESH kërkon blerjen e 21 mijë ton karbuant. TEC-et lundrues u pozicionuan në Portin e Triportit në shtator të vitit 2022, pas një procedure të ndërmarrë në kuadër të krizës energjetike, që ka përfunduar zyrtarisht në datën 31 dhjetor 2023.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
