Drejtoria e Kontrollit të Specializuar pranë Administratës Tatimore ka nisur kontrollin për makinat e luksit të blera nga individë të paregjistruar në organet tatimore.
Nga të dhënat e vëna në dispozicion nga Drejtoria e Përgjithshme e Shërbimeve të Transportit Rrugor rezulton se 400 automjete janë blerë gjatë vitit 2023-2024 nga persona të cilët nuk kanë të ardhura të deklaruara.
Sipas administratës tatimore, aksioni për kontrollin e individëve që disponojnë automjetet e luksit, do të përfshihen në një proces verifikimi, nga ku do të analizohen përmes të ardhurave të deklaruara, përpuethshmërisë së tyre me vlerën e pasurive të zotëruara, si dhe me dokumentacionin justifikues të burimit financiar.
“Administrata Tatimore u sugjeron individëve të deklarojnë të ardhurat e përdorura për blerjen e këtyre mjeteve në mënyrë që të shmangin penalitete.
Të gjithë individët që zotërojnë automjete të kategorisë luksoze do të përfshihen në procesin e verifikimit nëpërmjet analizës së:
Të ardhurave të deklaruara pranë AT
Përputhshmërisë së tyre me vlerën e pasurive të zotëruara
Dokumentacionit justifikues të burimit financiar”, thuhet në njoftim.
Verifikimi i të ardhurave dhe kontrolli i pasurive të pajustifikuara
Ndër vite, në AT është investuar lidhur me krijimin e sistemeve për të identifikuar evazionin tatimor apo për të pasur instrumenta ndihmëse. Përpos projektit të fiskalizimit, me ligjin e vitit 2020 është krijuar Regjistri Qëndror i Llogarive Bankare i cili është një bazë e të dhënave shtetërore. Qëllimi i krijimit të këtij regjistri është krijimi i kushteve për parandalimin e përdorimit të sistemit financiar në Republikën e Shqipërisë, për pastrimin e parave dhe produkteve me origjinë nga vepra penale, për parandalimin e financimit të terrorizmit, si dhe për lehtësimin e procedurave për mbledhjen e detyrimeve tatimore, taksat apo tarifat, në nivel qendror apo lokal.
Administrata Tatimore ka bërë përparime në përputhje me standardet e Shkëmbimit Automatik të Informacionit (AEOI) të OECD. Shqipëria mbetet e vetmi vend i Ballkanit Perëndimor që zbaton kuadrin ligjor AEOI dhe ndau informacionin e saj me më shumë se 77 juridiksione (përfshirë 24 Shtete Anëtare të BE-së) në vitin 2022.
Prioritet tashmë përbën fillimi i përpunimit dhe përdorimit të informacionit rreth taksapaguesve të marrë gjatë kësaj periudhe. Me strukturën e re të AT të miratuar në Maj 2023, është krijuar Drejtoria e Informacionit- Sektori i Komunikimit, i cili do jetë përgjegjës edhe për CRS. AT është në fazën e rekrutimit të stafit dhe me rektrutimin e tij lind nevoja edhe për trajnimin e tij lidhur me CRS.
Prioritare do të jetë krijimi i dy sistemeve të rëndësishme, për AT për të pasur të dhënat e nevojshme mbi pasuritë totale të individëve, nga palët e treta, për të bërë investigimet përkatëse për përputhshmërinë tatimore.
Bazuar në sistemet ekzistuese si dhe në sistemet e reja, në periudhën afatmesme AT do të ndërmarrë një seri auditimesh si të individëve ashtu edhe të tatimpaguesve.
Plani i Rritjes së Axhendës së Reformave të KE-së ka përcaktuar katër masa të qarta me indikatiorë e afate lidhur me krijimin e regjistrit të aseteve, përdorimin e të dhënave të palëve të treta, auditimi i mbi 200 individëve të pasur brenda vitit 2026. Masat që do të ndërmerren nën këtë komponent si dhe në komponentin 2.4 lidhur me zvogëlimin e shmangieve tatimore do të bëjnë të mundur reazlimi e këtyre kushteve dhe të indikatorëve përkatës.
Prioritetet:
Prioritetet për periudhën 2024-2027 janë:
- Zbatim plotësisht i kushteve sipas Planit të Rritjes në:
- Ngritja e Regjistrit të Aseteve të tatimpaguesve me synimin e një vlerësimi real të pasurive të tatimpaguesit, dhe plotësimi i regjistrit të pasurive të tatimpaguesve për 10% të tatimpaguesve brenda vitit 2026.
- Përdorimi i të dhënave nga palë të treta si nga regjistri i shërbimeve publike (elektrike, ujë , regjistri i automjeteve, bashkive për t’i mundësuar AT hetimin e pasurive të pajustifikuara te taksapaguesve (qershor 2025).
- Kryerja e procedurave të auditimit për mbi 200 individë të pasur, bazuar në vlerësimin e riskut, brenda vitit 2026.
Postimi ” Kontrolli i pasurive, Tatimet hetojnë pronarët e makinave të luksit që nuk justifikojnë të ardhurat ” eshte marre nga Revista Monitor.
