Industria kozmetike shqiptare ka potencial për t’u rritur, por si fillim duhet të krijohen kushtet e përshtatshme. Mikena Çako dhe Ada Kastrati, bashkëthemeluese të “ADA Herbs” që prodhimin e bën në Francë, shprehen se, edhe pse ideja lindi në Shqipëri, materializimi është i vështirë.
Në vendin tonë, sipas tyre, nuk ka teste mikrobiologjike për produktet kozmetike, qoftë në laborator privat apo shtetëror, ndaj dhe krijimi i produkteve kozmetike në Shqipëri kërkon shërbime të shumëfishta nga jashtë, që rrisin kostot në mënyrë të skajshme.
Ndaj edhe pse ideja është “Made in Albania”, prodhimi është “Made in France”, që kompaninë gjithsesi e ka ndikuar pozitivisht në imazh.
Mikena Çako
Bashkëthemeluese, Drejtuese Ekzekutive, Formuluese
Ada Kastrati
Themeluese, Formuluese
Si nisi rrugëtimi i “Ada Herbs” dhe a mund të na jepni disa detaje për profilin e kompanisë në gamën e produkteve që ofroni?
“Ada Herbs” lindi 10 vite më parë nga ëndrrat me sy hapur të dy motrave, kur ende ishim studente. Të rritura në një familje të angazhuar në biznes familjar, u ndezën shkëndijat e sipërmarrjes që në vegjëli.
Të magjepsura nga një botë plot shkëlqim, ajo e bukurisë, me shumë dashuri krijuam “Kombinimin Vajor” që sot është produkti i bukurisë më i shitur brenda dhe jashtë Shqipërisë. Nuk ka vajzë shqiptare që nuk e ka një shishe “magjike” në raftet e saj. Pa lënë pas vëmendjes dhe djemtë që kujdesen çdo ditë e më shumë për veten.
Nisur nga një produkt, por pa ndalur në këtë rrugëtim, sot ofrojmë në treg një gamë shumë më të madhe dhe të kompletuar produktesh. Kemi përpunuar dhe hedhur në treg linja të plota kujdesi për flokët, fytyrën dhe trupin. 10 vite tregojnë shumë për sukseset, por edhe për sakrificat.
Edhe pse kombinimi vajor është produkti “par excellence”, kujdesit personal i nevojiten produkte të ndryshme, shampo, trajtues nxehtësie, kremra, serume, larës të ndryshëm për fytyrën, kremra trupi e deri te zbutësit e buzëve.
Kur ne nisëm para 10 vitesh, kompanitë e mëdha sapo kishin filluar të zhvillonin produktet organike dhe është pikërisht ajo që na ka veçuar në treg. Nga dita e parë e në vijim kemi prodhuar vetëm produkte organike të certifikuara. Madje e kemi çuar efektin zinxhir deri në fund, duke përdorur paketimet në qelq dhe letër të riciklueshëm, të ripërdorshëm.
Si e përzgjidhni lëndën e parë që përdorni në produktet tuaja? A sigurohen ato lëndë edhe në tregun shqiptar, apo vetëm në atë të huaj?
Krijimi i çdo formule nis nga Shqipëria, sepse këtu jemi ne. Produktet tona formulohen, krijohen e më pas në kushte sigurie dhe patentimi prodhohen në Francë, pasi kanë kaluar të gjitha etapat e standardizimit të nevojshëm të certifikimeve që mbartin.
Lënda e parë sigurohet nga e gjithë bota, më së shumti Jugu i Francës, ku gjenden edhe laboratorët tanë. Filtrat e nevojshëm për sigurinë e produkteve tona kalohen me standardet e BE-së dhe ekselencën e prodhimit francez.
Shqipëria është pjesë jo e drejtpërdrejtë për arsyen e thjeshtë së tregtimi dhe prodhimi i lëndës së parë për kozmetikën është i vështirë. Kjo është edhe një nga arsyet që na ka drejtuar ta zhvendosim prodhimin tonë në Francë, kryeqendrën botërore të kozmetikës cilësore dhe me standard.
Ky është një vendim strategjik i kompanisë për të qenë në tregun europian dhe atë amerikan. Të hedhësh në treg një produkt “Made in France” mbart seriozitetin dhe përgjegjshmërinë e një prej superfuqive më të mëdha në botë.
Ku bëhet prodhimi i produkteve tuaja dhe cila është pika e fortë që marketoni?
Produktet prodhohen në Francë, që është një garanci për cilësinë, standardin, ekspertizën, transparencën e plotë në prodhim.
Marketojmë fort cilësinë e produkteve, formulat unike organike, të cilat kanë kaluar certifikimet e nevojshme për efektet e pohuara. Por marketimi më i mirë na vjen nga vetë klientët.
Si kanë ndryshuar kostot e prodhimit, duke pasur parasysh situatën e pandemisë që ka rritur kostot në çdo segment?
Jashtëzakonisht shumë. Jemi prekur që në fillim të pandemisë me rritjen e çmimit të transportit thuajse 5-fish dhe ka qenë e vazhdon të jetë një sfidë e përditshme, si në sigurimin e lëndës së parë, paketimeve apo edhe vetë realizimin e prodhimit në kohë.
Shumë vende, burime të lëndëve të para për kozmetikën organike, janë duke kufizuar importet e tyre dhe kjo na bën shumë të ndjeshëm ndaj rritjeve të çmimeve, apo vonesave në aksesim të saj.
Që prej situatës së luftës në Ukrainë, shumë fabrika paketimesh në Europë janë duke pezulluar prodhimet e tyre deri më 2023, prej kostove të larta të energjisë. Industria e kozmetikës, në një treg të madh botëror, që tashmë edhe ne jemi pjesë, punon me stok të madh. Kjo na ka favorizuar të mbështesim dhe të mbrojmë sa të mundemi blerësin tonë, duke shmangur rritje të mëdha në çmime dy vitet e para. E ardhmja nuk shihet e qetë, prandaj pak e nga pak edhe te konsumatori ynë po reflektohen rritjet e çmimeve që deri më tani mundem t’i përballonim në kostot tona.
Sa e lehtë është për një markë kozmetike shqiptare të depërtojë në tregjet e huaja? Si ka qenë ecuria juaj në tregun vendas dhe atë të huaj?
Është e vështirë prej kufizimit të gjuhës që hasim që në fillim, pasi jo me të gjithë konsumatorët shqiptarë mund të komunikojmë në një gjuhë ndërkombëtare, siç është anglishtja. Kjo na kufizon me pjesën tjetër të botës.
Në aspektin e produkteve është e lehtë nëse e gjithë marka ka një identitet të veçantë, që komunikohet lehtësisht dhe reflektohet në produkte shumë të mira dhe rezultative.
Pas 10 vitesh në treg jemi përshtatur për çdo tipologji blerësi dhe kemi depërtuar në tregun ndërkombëtar me ndihmën e klientëve. Na pret rrugëtim i gjatë dhe i vështirë, por besimi absolut në produktet që hedhim në treg na jep forcë për betejat që na presin.
Cilat janë planet tuaja të biznesit në vijim në lidhje me zgjerimin e gamës së produkteve dhe në tregje të reja?
Ne gjithmonë krijojmë, është çka na pëlqen më shumë, por ecim përpara, duke dëgjuar përdoruesit tanë dhe vetë tregun. E ardhmja jonë do të jetë shumë ekologjike, gjithmonë e më shumë pro natyrës.
I gjithë tregu kozmetik po shkon drejt të qenët “të qëndrueshëm”. Këtë rrugëtim e kemi zgjedhur që në fillimet tona dhe do të vazhdojmë ta bëjmë gjithmonë. Nuk është vetëm me formulat, lëndën e parë që respektojnë natyrën dhe ligjet e saj, por edhe me paketimet tona, të cilat janë qelq e letër. Lufta e rëndësishme e mbrojtjes së planetit është detyrë e të gjithëve dhe ne kemi vënë gurin tonë.
Sa sfiduese është integrimi në rrjete shitjeje të konsoliduara të tilla si Sephora, Douglas apo rrjete të tjera dhe a e keni menduar të jeni pjesë e rrjeteve të ngjashme?
Për vetë faktin që rrugëtimi ynë ka nisur në Shqipëri, në një treg shumë të vogël, na bën ta kemi rrugëtimin tonë drejt tregut ndërkombëtar të vështirë. Të qenët pjesë e një rrjeti shitjesh si Sephora, Douglas etj., kërkon jo vetëm histori shitjesh të suksesshme dhe të gjatë në kohë, por edhe shumë standard në produkt.
Ne e kemi nisur këtë rrugëtim dhe jemi vlerësuar prej revistave prestigjioze “Vogue”, “Glamour” dhe “Health & Wellbeing” për produktet tona, cilësinë dhe të mirat që ato përcjellin te përdoruesit. Hapat e tjerë drejt konsumatorit ndërkombëtar i kemi gati, kompania është konsoliduar për të qenë në një hap me të njësojtët e vet në tregun e madh të përzgjedhjes.
A mendoni se në Shqipëri ka vend për të zhvilluar industrinë kozmetike dhe cilat janë avantazhet dhe disavantazhet që ndikojnë në këtë zhvillim?
Shqipëria ka shumë potencial njerëzor, klimë të jashtëzakonshme, bimësi të shumëllojshme e të rrallë.
Por bëhet shumë e vështirë në momentin që përballemi me mungesën e theksuar të infrastrukturës teknologjike, laboratorike në vend. Shqipëria, momentalisht, nuk ofron as teste mikrobiologjike për produktet kozmetike, qoftë në laborator privat apo shtetëror, ndaj dhe krijimi i produkteve kozmetike në vend kërkon shërbime të shumëfishta nga jashtë, duke shënjuar rritje të skajshme të kostove, të cilat nuk e justifikojnë standardin.
Si ka ndryshuar tendenca e konsumatorëve për produktet kozmetike dhe të kujdesit, ku po orientohen më shumë?
Konsumatori është shumë inteligjent dhe përmirëson cilësinë e blerjes çdo ditë e më shumë, që nga kuptimi i etiketës së produkteve deri te cilësimi real i kompanive ofertuese.
Produktet organike kozmetike, gjithmonë e më shumë, po marrin vlerësimin e konsumatorit shqiptar, duke e kthyer atë në një konsumator të informuar dhe me plot dëshirë për të qenë strikt me cilësinë e produkteve që vendosin të përdorin në flokët dhe lëkurën e tyre.
Postimi ” “Kozmetika ka potencial, por e kufizon mungesa teknologjike e laboratorike” ” eshte marre nga Revista Monitor.
