Kredia konsumatore është në rritje të shpejtë këtë vit dhe ka arritur nivelet më të larta historike.
Sipas të dhënave nga Banka e Shqipërisë, për 8-mujorin 2024, kredia e re për konsum e dhënë nga sektori bankar arriti vlerën e 30.5 miliardë lekëve, në rritje me 23% krahasuar me të njëjtën periudhë të një viti më parë.
Huadhënia konsumatore është gjithnjë e më e përqendruar në monedhën vendase. Afërsisht 90% e kredisë së re konsumatore të dhënë gjatë këtij viti ka qenë në lekë.
Rritja e kredisë paraqitet mjaft e lartë si në segmentin e mallrave të qëndrueshëm, ashtu edhe në atë për mallra jo të qëndrueshëm. Mallrat e qëndrueshëm në përgjithësi përkufizohen si produkte që kanë një jetëgjatësi më të madhe se tre vjet. Kredia konsumatore për këtë qëllim përfshin kryesisht financimin e blerjes së pajisjeve elektronike, elektroshtëpiake, mobilieve, automjeteve, etj.
Norma mesatare e interesit për portofolin e kredisë konsumatore në lekë në fund të muajit korrik raportohej nga Banka e Shqipërisë në nivelin 9.36%, nga 9.66% që kishte qenë një vit më parë.
Vlera totale e portofolit të kredisë konsumatore në fund të muajit gusht kishte vlerën e 83.8 miliardë lekëve, me një rritje vjetore prej 13%.
Rritja e kredisë konsumatore po konfirmon ecurinë pozitive të kreditimit të individëve, e mbështetur nga ecuria e mirë e ekonomisë dhe nga normat relativisht të ulëta të interesit.
Mbështetur në rezultatet e vrojtimit të fundit të aktivitetit kreditues, bankat kishin pritshmëri për vijimësinë e kërkesës së lartë për kredi me qëllim financimin e konsumit.
Ekonomia shqiptare u rrit me afërsisht 4.1% në tremujorin e dytë të vitit, e mbështetur sidomos nga sektorët ndërtimit dhe të tregtisë.
Analizat e Bankës së Shqipërisë kanë treguar se kredia konsumatore zakonisht ka një natyrë prociklike, duke qenë se është një kredi që mbështet konsumin dhe ndjek rritjen e tij.
Për këtë arsye, ecuria e kredisë konsumatore mund të jetë një indikator për përmirësimin e tendencave të konsumit privat në ekonomi. Kjo konfirmohet edhe nga të dhënat më të fundit zyrtare të Prodhimit të brendshëm Bruto.
Mbështetur në të dhënat e INSTAT, konsumi privat në ekonomi u rrit me 6% në tremujorin e dytë të vitit, duke qenë ndër komponentët e shpenzimeve me ndikimin kryesor në rritjen ekonomike. Rritja e konsumit privat u përmirësua ndjeshëm krahasuar me nivelin prej 3.7% të tremujorit të parë të vitit. Përveç kontributit të turizmit, duket se konsumi privat në ekonomi po mbështetet edhe nga cikli në rritje i kreditimit të konsumatorëve vendas nga sektori bankar.
Gjithashtu, ecuria e mirë e tregut të punës, karakterizuar nga norma papunësie pranë niveleve më të ulëta historike dhe rritja dyshifrore e pagave, në vetvete përbëjnë premisa pozitive për të mbështetur rritjen e kredisë konsumatore në ekonomi./E.Shehu
Burimi: Banka e Shqipërisë
Postimi ” Kredia konsumatore u rrit me 23% për 8-mujorin ” eshte marre nga Revista Monitor.
