Në forumin e biznesit Shqipëri-Gjermani që u zhvillua në Tiranë, ministrja e Bujqësisë Frida Krifca u shpreh se Shqipëria është vend që prodhon pothuajse totalisht në mënyrë organike dhe se sektori i peshkimit detar prej 450 anijesh së bashku me prodhimet e akuakulturës gjenerojnë më shumë se 80 milion euro eksporte në vit.
Sipas njoftimit ajo parashtroi blegtorinë dhe zinxhirin e vlerës së mishit dhe të produkteve blegtorale, si një mundësi të mirë dhe e vyer bashkëpunimi me sipërmarrjet e huaja, në procesin e ristrukturimit të zinxhirit të vlerës, dhe forcimit të sigurisë ushqimore në sektor.
Gjithashtu, Krifca u shpreh se Shqipëria është një vend mesdhetar që dallohet për produktet emblematike siç janë vreshti, vera, ulliri, vaji i ullirit e bimët aromatike .
Duke u ndalur tek trendi i ri në rritje i eksporteve bujqësore, Krifca vuri në dukje se, prodhimet bujqësore “Made in Albania” po kërkohen gjithë e më shumë nga tregjet e huaja duke zgjeruar gjeografinë e vendeve deri në Azi, vendet skandinave, SHBA etj. “Sot bujqësia zë mbi 66% të volumit te sasisë se eksporteve dhe 43% të vlerës së eksporteve totale që Shqipëria realizon”, shtoi ajo.
Ajo bëri me dije gjithashtu se ka lidhur një partneritet edhe me Ministrinë e Bujqësisë në Gjermani. “Këtë vizitë të këtyre bizneseve e kemi marrë shumë seriozisht si qeveri dhe jemi të gatshëm të ofrojmë gjithë hapësirën e bashkëpunimit në mënyrë që disa nga këto biznese të kenë mundësinë të shtrihen në Shqipëri, të krijojnë partneritete me biznesin shqiptar apo mundësisht të hapin edhe filialet e tyre në vendin tonë”, tha Krifca.
Ministrja shprehu bindjen se, mundësitë për të zhvilluar më tej këtë sektor nëpërmjet investimeve të reja dhe përdorimit të teknikave novatore dhe inteligjente, janë të pafundme. “Ne jemi të hapur për çdo bashkëpunim i cili synon rritjen e kapaciteteve prodhuese të aktorëve të biznesit, rritjen e kapacitetit të tyre për inovacion dhe bashkëpunim, forcimin e lidhjeve me tregjet ndërkombëtare nëpërmjet rritjes së shërbimeve, të ruajtjes dhe përpunimit”, deklaroi ajo.
Një fjalë përshëndetëse në aktivitet mbajti dhe ambasadori i Gjermanisë në Shqipëri, Peter Zingraf, i cili tha se mbështetja zgjerohet në disa fusha të rëndësishme.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
