Më pak individë po blejnë shtëpi dhe më pak biznese po zgjerojnë aktivitetin e tyre. Është kjo situata që rrëfejnë të dhënat e kreditimit të ekonomisë shqiptare gjatë 7 muajve të parë të këtij viti.
Kredia e re në periudhën Janar-Korrik arriti në vetëm 161.9 miliardë lekë, një rritje shumë e ngadaltë krahasuar me ritmet e vitit të shkuar. Por po të mos ishte për kompanitë shtetërore që morën më shumë hua këtë vit, do të kishim madje një rënie të kredisë së re.
Tek individët financimi është në stanjacion, ndërsa tek bizneset ka madje rënie dhe për të dyja kjo kategori korriku rezultoi shumë i dobët. Kriza e çmimeve, pasiguritë që shoqërojnë ekonominë dhe mbi të gjitha shtrenjtimi i normave të interesit janë arsyet që po ulin urinë për kredi të re.
Sipërmarrja ka reduktuar ndjeshëm kërkesat në banka për kredi për blerje pajisjesh, ndërsa nga ana tjetër po kërkon overdraft dhe kapital qarkullues, për të arritur të paguajë punëtorët, furnitorët dhe detyrimet e tjera.
Ndërsa për familjet shqiptare është rritur po ashtu overdrafti dhe kredia e thjeshtë konsumatore nga njëra anë, por nga ana tjetër ka rënë kredia për mallra të qëndrueshëm, si një automjet, apo edhe ka rënë kredia për blerje banesash.
Me 27 miliardë lekë, kundrejt 27.8 miliardë lekëve të 7-mujorit 2022, dhe duke konsideruar rritjen e vazhdueshme të çmimeve të pasurive të paluajtshme, më pak individë patën mundësinë të përballojnë këstet mujore për të blerë një pronë.
Megjithatë, një tjetër arsye që mund të ketë ndikuar në rënien e huave për banesa, është edhe Kadastra, që sipas noterëve dhe bankave ka krijuar vonesa të mëdha në përgjigjen e aplikimeve.
Muaji Korrik, kur kadastra nisin zyrtarisht punën vetëm online, regjistroi kreditë më të ulëta të disbursuara për blerje prone në të paktën dy vitet e fundit.
Kreditë konsumatore nga mikrofinanca, Banka e Shqipërisë përditëson tavanet e normave të interesit
Inflacioni i lartë në BE, lajm i keq për konsumatorët dhe kredimarrësit shqiptarë në euro
Burimi: A2 CNN
