Aksionet e prodhuesve europianë të makinave u rritën me 2.5% deri në 5% të enjten në mëngjes, pasi Presidenti amerikan Donald Trump propozoi uljen e standardeve të kursimit të karburantit, të finalizuara nga paraardhësi i tij Joe Biden.
Administrata Trump e paraqiti këtë ndryshim, që synon t’u lehtësojë prodhuesve shitjen e makinave me benzinë, si një mënyrë për të ulur kostot për konsumatorët amerikanë, tha një tregtar.
Aksionet e Porsche u rritën me mbi 5%, ndërsa Mercedes dhe Volvo Car fituan gati 4%. Renault u rrit me 3.3%. Aksionet e Stellantis, si ato të listuara në Milano ashtu edhe në Paris, u rritën rreth 2.7%, pasi një ditë më parë kishin shënuar një rritje gati 8%.
Shefi ekzekutiv i Stellantis, Antonio Filosa, tha në një deklaratë se mezi pret të bashkëpunojë me Administratën Kombëtare të Sigurisë së Trafikut në Autostrada të SHBA-së për “politika mjedisore të përgjegjshme, të cilat njëkohësisht na lejojnë t’u ofrojmë klientëve lirinë për të zgjedhur automjetet që duan me çmime të përballueshme”.
Volvo Cars deklaroi se është ende shumë herët për të spekuluar mbi pasojat e ndryshimit rregullator.
Edhe pse kompania synon të bëhet prodhuese plotësisht elektrike dhe të arrijë objektivin e emetimeve neto zero deri në vitin 2040, ajo ka bërë të ditur më herët gjatë vitit se planifikon të nisë prodhimin e disa modeleve hibride në SHBA, me një prej tyre të planifikuar të dalë në vitin 2029.
Analisti i Equita-s, Martino De Ambroggi, tha se ndryshimi i propozuar nuk ishte i papritur, por pritet të ketë efekt pozitiv për gjithë sektorin. Ai vuri në dukje gjithashtu raportimet se Bashkimi Europian mund të zbutë ose të modifikojë ndjeshëm objektivat e elektrifikimit për vitin 2035.
Burime nga industria thanë të mërkurën se Komisioni Europian mund të shtyjë njoftimin e paketës së mbështetjes për industrinë automobilistike të BE-së, të cilën prodhuesit shpresojnë se mund të përfshijë edhe rishikimin e ndalimit të shitjes së motorëve me djegie pas vitit 2035./ Reuters
Postimi ” Kthesa e Trump për rregullat e karburantit rrit aksionet e prodhuesve europianë të makinave ” eshte marre nga Revista Monitor.
