Për herë të parë është mbajtur konferenca e parë rajonale “Pensionet Private në Fokus”, e cila zhvillohet për në kuadër të informimit, edukimit dhe zhvillimit të pensioneve private në Shqipëri.
Qëllimi i kësaj konference ishte ndarja e eksperiencave të vendeve të rajonit por edhe nga SHBA, e Britania e Madhe ku i’u dha prioritet edhe diskutimit të projktligjit “Për pensionet private”, që pritet të miratohet së shpejti në Kuvend. Sipas kreut të Albsig Invest, Elton Korbi, kjo konferencë do të shërbejë si shkëmbim idesh, apo sesi mund të shtohen shtylla të tjera në pensionet private.
“Momenti është i duhur pasi ne jemi në fazën e diskutimit përfundimtar të një projektligji, që ka të bëjë me pensionet private. Aktualisht ne fondet e pensionit i operojmë me një ligj të miratuar në vitin 2009, dhe tashmë kishte ardhur koha për ta zëvendësuar si ligj dhe për ta përafruar me direktivat europiane. Aktualisht ligji diskutohet në komisionet parlamentare dhe shumë shpejt do kaloj për miratim në parlament, dhe prandaj menduam që organizimi i kësaj conference do t’i jepte një shtysë, jo vetëm miratimit të këtij ligji, por edhe për të parë rrugë të tjera sesi mund të vazhdohet me shtyllat e tjera, për të plotësuar të gjithë skemën sociale për pensionistët.”
Ndërkaq, projektligji i hartuar nga Autoriteti i Mbikëqyrjes Financiare, tashmë vjen me risi për të përmirësuar tregun e pensioneve private.
“Ligji është hartuar nga AMF, megjithatë në aktorët e tregut bën pjesë dhe Albsig Invest, ka kontribuar dhe ka dhënë një kontribut të madh për përmirësimet e këtij ligji. Ne si shoqatë dhe ne si shoqëri kemi dhënë rekomandime të ndryshme për pjesën e taksave që është pjesa kryesore që ka të bëjë me përmirësimet apo me hapat që duhet të ndjek ky ligj. Aktualisht ky përjashtim i taksave është goxha i lartë, megjithatë me ligjin e ri ai do bëhet sa është paga minimale, kështu që do rrisim me një shkallë të madhe përjashtimin e lejuar të kontributit që do bëjë gjithsecili në fond pensioni. Gjithashtu një risi tjetër që sjell për punëdhënësit ky ligj, është kontributi që bën për punonjësit e tij. Aktualisht kontributi që bën punëdhënësi, brenda dy viteve njihet si e ardhur e punonjësit. Me ligjin e ri ne kemi propozuar të jetë 5 vjet, për arsye se punëdhënësit kishin kërkuar që kjo periudhë të jetë më e gjatë dhe punonjësit jo vetëm të jenë më të kënaqur por të kenë të marrin benefite dhe kontribute, por të jenë dhe më të qëndrueshëm në vendet e punës në të cilën ata janë.”
Ndërkaq, një tjetër risi ka të bëjë me përfitimet tatimore, është përjashtimi në tërheqje të fondit të pensionit. Në projektligjin e ri kontributet e bëra si nga punëdhënsi apo punëmarrësi, në momentin e tërheqjes nuk do të tatohen. Vetëm të ardhurat nga interesi do të tatohen në shkallën e 15%.
Diamila Leka/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
