Ngërçi në Capitol Hill rrezikon qindra mijëra vende pune dhe miliarda dollarë humbje ekonomike
Qeveria e SHBA-së është mbyllur për herë të parë pas gati shtatë vitesh, duke vënë në rrezik qindra mijëra vende pune dhe duke e zhytur Uashingtonin në një nga krizat më të mëdha politike të mandatit të dytë të Donald Trump.
Kriza e buxhetit në Shtetet e Bashkuara po reflektohet edhe në funksionimin e përfaqësive diplomatike jashtë vendit. Për shkak të vonesës në miratimin e fondeve buxhetore, ambasadat amerikane kanë njoftuar kufizime në aktivitetin e tyre të përditshëm. Në një njoftim publik, theksohet se komunikimi zyrtar dhe përditësimet në faqet zyrtare të rrjeteve sociale do të reduktohen ndjeshëm, përveç rasteve të emergjencave të lidhura me sigurinë.
“Për shkak të vonesës në miratimin e fondeve buxhetore, kjo llogari në Facebook nuk do të përditësohet rregullisht – me përjashtim të informacioneve urgjente për çështjet e sigurisë – derisa të rinisë veprimtaria e rregullt. Gjatë kësaj kohe, shërbimet e planifikuara të pasaportave dhe vizave për tranzit në Shtetet e Bashkuara dhe në ambasadat e konsullatat jashtë vendit do të vazhdojnë sipas mundësive. Për më shumë informacion mbi shërbimet tona dhe statusin operativ, vizitoni: travel.state.gov.”
Mbyllja, e cila filloi menjëherë pas mesnatës në Uashington, erdhi pasi republikanët dhe demokratët nuk arritën të gjenin një marrëveshje për financimin e qeverisë federale në vitin e ri fiskal.
Agjencitë federale pritet të nisin pushime masive të stafit dhe të shkurtojnë shërbimet publike.
Në një sërë votimesh të martën vonë, republikanët dhe demokratët në Senat hodhën poshtë propozimet rivale, që do të kishin parandaluar mbylljen. Mbyllja pritet të rezultojë në pushimin nga puna të rreth 750,000 punonjësve dhe mund t’i kushtojë ekonomisë amerikane miliarda dollarë në humbje prodhimi.
Mbyllja do ta bëjë gjithashtu më të vështirë për politikëbërësit dhe investitorët të matin forcën e ekonomisë, pasi raportet kyçe, përfshirë të dhënat për punësimin që priteshin këtë të premte, do të shtyhen.
Gjatë mbylljes, qeveria federale ndalon të gjitha funksionet jo-thelbësore, ndërsa punonjësit puna e të cilëve konsiderohet thelbësore, si ushtarakët aktivë dhe oficerët federalë të zbatimit të ligjit, duhet të paraqiten në punë, shpesh pa pagesë.
Republikanët kishin kërkuar nga demokratët të pranonin një rezolutë të përkohshme, ose masë të përkohshme, që do ta mbante qeverinë të financuar në nivelet aktuale deri më 21 nëntor. Udhëheqësit demokratë argumentuan se çdo marrëveshje financimi duhet të përfshinte një zgjatje të subvencioneve të kujdesit shëndetësor që pritet të skadojnë në fund të vitit.
Të gjithë, përveç tre senatorëve demokratë, votuan kundër rezolutës së përkohshme të republikanëve, duke bërë që masa të mos arrinte pragun e nevojshëm prej 60 votash për të kaluar në dhomën e sipërme të Kongresit.
Trump të martën paralajmëroi demokratët të mos e rrëzonin masën e përkohshme, duke kërcënuar se do të pushonte nga puna “shumë” punonjës qeveritarë nëse mbyllja vazhdonte, në vend të procedurës së zakonshme të pushimit të përkohshëm të punonjësve publikë.
“Demokratët duan ta mbyllin qeverinë,” u tha Trump gazetarëve në Zyrën Ovale. “Kur e mbyll, duhet të bësh shkurtim vendesh pune, kështu që do të pushonim nga puna shumë njerëz që do të preken rëndë.”
Udhëheqësit demokratë në Capitol Hill ngulën këmbë se çdo marrëveshje financimi duhet të kthente 1 trilion dollarë në shkurtime të Medicaid, skema e sigurimeve shëndetësore për amerikanët me të ardhura të ulëta, që ishte pjesë e projektligjit të shpenzimeve të miratuar nga Trump këtë verë.
Herën e fundit që qeveria e SHBA-së u mbyll ishte gjatë administratës së parë të Trump, nga dhjetori 2018 deri në janar 2019. Mbyllja zgjati më shumë se një muaj dhe çoi në pushimin nga puna të rreth 800,000 punonjësve.
Zyra jopartiake e Buxhetit të Kongresit (CBO) tha të martën se priste që këtë herë të pushonin rreth 750,000 punonjës, me një kosto prej rreth 400 milionë dollarësh në ditë.
CBO vlerësoi se mbyllja e fundit uli prodhimin ekonomik me 11 miliardë dollarë, përfshirë 3 miliardë që nuk u rikuperuan kurrë.
Por CBO tha se efektet e një pezullimi tjetër mbi aktivitetin e biznesit ishin “të pasigurta” dhe do të vareshin, pjesërisht, nga fakti nëse administrata do të kërkonte të pushonte nga puna në vend që t’i pezullonte përkohësisht punonjësit.
Udhëheqësi i shumicës republikane në Senat, John Thune, tha të martën vonë se synonte të mbante më shumë votime që të mërkurën, për të provuar të kalonte rezolutën e përkohshme të republikanëve për të rihapur qeverinë.
“Demokratët mund të kenë zgjedhur ta mbyllin qeverinë sonte. Por ne mund ta rihapim nesër,” tha Thune. “Mjafton një grusht demokratësh që t’i bashkohen republikanëve për të kaluar projektligjin e pastër, jopartiak për financimin që kemi përpara.”
Chuck Schumer, lideri i demokratëve në Senat, tha se ishte “plotësisht i gatshëm” për të zhvilluar më shumë negociata me Thune, me udhëheqës të tjerë të Kongresit dhe me Shtëpinë e Bardhë. Por ai shtoi se bisedimet duhet të jenë “dy-partiake” dhe “të kenë kontribut real nga të dyja palët”. / FT
Postimi ” Mbyllet qeveria e SHBA-së pasi ligjvënësit nuk arritën një marrëveshje, ambasada kufizon aktivitetin ” eshte marre nga Revista Monitor.
