Milva Ekonomi, ministre e Shtetit për Standardet dhe Shërbimet, e ftuar në “A2Business” nga Aurora Sulçe foli për vendimin më të fundit të qeverisë shqiptare për rritjen e pagave.
Sipas Ekonomit, kur bëhet fjalë për pagën minimale, Shqipëria e ka pasur më të ultën në rajon, ndërsa sot nuk është kështu, sepse e ka rritur atë, duke shkuar në nivelin 40 mijë lekë të reja nga prilli i këtij viti.
Ajo shtoi më tej duke thënë se, ata që do të përfitojnë nga rritja e pagave janë gjithsej 130 mijë e 300 vetë, domethënë nuk janë 140 deputetët dhe ministrat.
Sa efektive pritet të jetë kjo rritje pagash që po bëhet në këtë formë, me këto fasha?
Rritja e pagave është një moment që kërkon shumë reflektim dhe reflektimet janë bërë në shumë dimensione ose në disa drejtime. Duhet të kemi parasysh që ne ishim një nga vendet në rajon që kishim pagat ndër më të ulëtat dhe kur bëhet fjalë për pagën minimale, Shqipëria e ka pasur më të ultën në rajon, ndërsa sot nuk është kështu, sepse e ka rritur atë, duke shkuar në nivelin 40 mijë lekë të reja nga prilli i këtij viti.
Diskutimet me biznesin kanë qenë të vazhdueshme duke filluar nga janari i këtij viti dhe duke arritur në konkluzionin që ka nevojë për një reformë në sistemin e pagave në Shqipëri.
Së treti, në momentin që morëm vendimet për reformën e pagave, që nuk ishte një vendim i tanishëm, mos harrojmë që patëm tërmet, pandemi, luftë, u lidh shumë me momentin kur po vinte ndërmarrja e kësaj reforme, dhe ishte një moment kur ekonomia shqiptare gjatë vitit 2022 performoi mirë në të gjithë sektorët e ekonomisë.
Nga ana tjetër ne patëm një rritje të të ardhurave, sidomos të TVSH-së shumë më të lartë se sa inflacioni.
Nga ana tjetër ishte shumë e rëndësishme që të mbaheshin talentet në vend, sepse këto ishin rekomandime që erdhën në momentin që u mor një reformë pagash. Reforma e pagave ka të bëjë me rritjen e pagave në administratën shtetërore.
Ata që do të përfitojnë nga rritja e pagave janë gjithsej 130 mijë e 300 vetë, domethënë nuk janë 140 deputetët dhe ministrat. Paga mesatare lëviz për të gjitha kategoritë. Të mos harrojmë që, pagat e sektorëve prioritarë si arsimi, shëndetësia, policia, forcat e mbrojtjes e kanë pasur rritjen e pagës që vitin e kaluar.
Burimi: A2 CNN
