Është prezantuar projekti për dixhitalizimin e sistemit fiskal në Kosovë. Ky projekt ka për synim që arkat fiskale në formatin hardwerik të cilat i përdorin aktualisht bizneset në Kosovë, të shndërrohen në arka digjitale apo softwerike.
Ministri i Financave, Hekuran Murati, ka bërë të ditur transformimin e sistemit të kasave fiskale në Kosovë, duke i kaluar ato në sisteme dixhitale.
Murati ka shpallur prezantimin e sistemit të ri fiskal, i cili synon të sjellë efikasitet dhe ulje të kostove për bizneset.
“Tash e sa kohë kemi punuar që të ndryshojmë sistemin e arkave fiskale, nga ato hardwerike siç është aktualisht, në arka fiskale softwerike apo dixhitale. Sot e bëmë edhe prezantimin e sistemit të ri, duke demonstruar edhe live se si funksionon. Sistemi i ri që kemi ndërtuar mundëson komunikimin me ofruesit e softwerit përmes API, që nënkupton hapjen e tregut, pra më shumë konkurrencë dhe rrjedhimisht edhe kosto shumë më të lirë të operimit. Pra, mjafton një laptop/kompjuter, dhe një printer termik, që një biznes të mund të lëshojë kuponë fiskalë, pa pasur nevojë të blihen arka fiskale të shtrenjta”.
Murtai ka thënë se sistemi i ri gjithashtu mundëson komunikimin edhe me aplikacion që skanon QR kodin e secilit kupon fiskal.
“Sistemi i ri gjithashtu mundëson komunikimin edhe me aplikacion që skanon QR kodin e secilit kupon fiskal, duke hapur rrugë për skema të ndryshme nxitëse që shpërblejnë qytetarët të cilët marrin kuponin fiskal. Do t’ju mbajmë të njoftuar për çdo zhvillim tjetër në këtë fushë. Stay tuned! Qeveria dixhitale”.
Kurse, drejtori i Administratës Tatimore të Kosovës, Ilir Murtezaj, tha se në vazhdën e progreseve të këtij institucioni lidhur me mbledhjen e tatimeve, sot po shpaloset edhe një zhvillim i ri, pra dixhitalizimi i fiskalizimit, apo ndryshe qasja softverike e arkave fiskale.
“Aktualisht kemi qasje hardwerike, pra me printerët e arkave fiskale, ndërsa tani është një qasje e re, e cila jep mundësi të reja të fiskalizimit dhe rritjes së formalizimit të ekonomisë në vend”.
Ky proces i fiskalizimit ka filluar që nga viti 2010 dhe që nga ajo kohë, , siç thotë Murtezaj, janë fiskalizuar mbi 33 mijë biznese.
“Nëse e shohim në përqindje të bizneseve aktive që janë, i bie që janë 30% e bizneseve të fiskalizuara, por nëse shohim në përqindjen e pjesëmarrjes së këtyre bizneseve në totalin e qarkullimit atëherë del që 80% e qarkullimit që bëhet në tërësi në Kosovë janë nga bizneset e fiskalizuara”.
Megjithatë, Murtezaj thekson se përmes kësaj platforme jepet mundësia që edhe bizneset që janë të pafiskalizuara të mund të fiskalizohen tani me kosto shumë më të ulët ose zero, dhe në të njëjtën kohë të mënjanohet edhe arsyetimi i pranimit të procesit të fiskalizimit nga ana e bizneseve, siç ka ndodhur rëndom deri më tani./Fatos Shala
Postimi ” “Mjafton një laptop dhe një printer”, kasat fiskale në Kosovë kalojnë në formën dixhitale ” eshte marre nga Revista Monitor.
